Thomas (66) brukar 20 timar i veka for at du skal få perfekte skiforhold

– Det er sjølvsagt varierande kor mykje dugnadsarbeid som må gjerast, men det hender eg er her 20 timar i veka, seier Haugsbø.

Den pensjonerte eldsjela er nestleiar på Langeland skisenter. Saman med dei andre eldsjelene inneber dugnadsarbeidet mellom anna å produsere og spa utpå kunstig snø, vere speaker på skikarusellen, sette i stand eit nytt grindbygg og i nokre høve tråkke løypene sjølv.

– For å halde skianlegga i gang er det avgjerande med frivillig arbeid, seier nestleiar på Langeland skisenter Thomas Haugsbø.

• Les også: Her måkar dei for harde livet for å redde løypa

Eit stort engasjement

Det er naudsynt å vere godt over gjennomsnittet interessert for å legge ned så mykje tid og krefter som Haugsbø gjer på Langeland.

– Interessa eg har for ski er veldig viktig, men i tillegg synest eg det som pensjonist er fint å ha noko å gjere på fritida. Miljøet og samhaldet blant dei frivillige her er òg noko eg set høgt.

• Les også: Frivillig arbeid bidreg til lykke

Set pris på eldsjelene

Thomas Haugsbø er ikkje aleine. Dei fleste skianlegga i landet er i stor grad basert på frivillig arbeid og dugnad. Arbeidet til eldsjelene er difor essensielt for at folk skal ha skiløyper å gå i.

– Me er heilt avhengige av frivillig arbeid for å halde skianlegga i gang, seier leiaren i Sogn og Fjordane skikrins, Ingrid Narum.

Ulønt arbeid stod for om lag 75 milliardar kroner i 2016, og idretten aleine stod for ein fjerdedel av denne summen ifylgje tal frå Statistisk sentralbyrå. Thomas Haugsbø og dei andre eldsjelene er blant dei som bidreg i denne statistikken. Leiaren for skikrinsen veit difor å sette pris på timane dei frivillige legg att i ulike skianlegg.

• Les også: Fekk skianlegg på dugnad

– Mange av eldsjelene stikk ikkje hovudet fram så mykje, men dei fortener all merksemd dei kan få, og Haugsbø er definitivt ein av dei, seier ho.