Svevande trehytte skal lokke turistar til bygda

– Eg får innimellom idear i hovudet mitt som ikkje vil gje seg. Trehytter har fascinert meg lenge. Det har vore bygd mange i Amerika – eg tenkte det var spennande å prøve det same her, seier Olav Aabrekk.

Grunneigar Jan Roger Engeset gav Aabrekk fritt spelerom til å utvikle planane sine.

– Jan Roger var positiv frå dag éin. Etter kvart som ideen vaks fram, vart vi einige om at dette skulle vera eit felles prosjekt.

Målet er at hytta skal vera ferdig i løpet av våren, og da blir ho open for utleige.

– Hytta er snart klar. Vi må laga ein sanitærdel ute, og det står att litt bardunering. Om responsen blir bra, har vi tenkt å byggje to hytter til. Vi har òg lyst til å laga ein terrasse oppe i trea, fortel Aabrekk.

– Kva er det beste som kan skje?

– Det må vera at det blir kø langt opp i vegen her. Eg håpar folk synest dette er artig.

Heng i fire vaierar

Hytta er tolv kvadratmeter og inneheld eitt rom. Ho blir innreidd med dobbeltseng, to lenestolar og ein kjøkenkrok med utslagsvask og gassbluss.

– Vi har vurdert å kjøpe inn telt som vi kan hengje opp i trea utanfor. Det blir fint for familiar, da kan dei vaksne sova inne og ungane overnatte ute i telt.

Hytta heng i fire vaierar som er festa i ulike tre. I tillegg skal ho bardunerast, og det er grunnpilarar under hytta. Men Aabrekk og Engeset har konstruert hytta slik at ho framleis røyver seg.

– Er det trygt å bu her?

– Ja. Fram til nå har hytta berre hange i vaierane, og trea har tolt det fint. Eg har konferert med ein «tredokter» om korleis vi skulle feste vaierane mest skånsamt og sikkert for trea. Eg har òg prata med ein byggmeister som har berekna tyngda.

Sauetema

Grunneigar Jan Roger Engeset er sauebonde, difor har hytta sauar som hovudmotiv.

– Benkeplata har vi støypt sjølve, og der la vi nedi nokre peparkakeformer av sauar for moro skuld.

Men dei som lurer på kor mykje ei overnatting ute i beitemarka kjem til å koste, må vente.

– Vi har ikkje bestemt oss enno. Det må vera litt eksklusivt, men vi vil ikkje overprise oss heller. Eg håpar vi kan tene litt på det, slik at vi kjem i gang med dei to neste hyttene, seier Olav Aabrekk.