Svak kronekurs lovar godt framfor turistsesongen

– For oss som driv i reiselivsbransjen så vil det ha ein viss positiv effekt. Vi oppleve allereie at dei turistane som vitjar Flåm no ser ut til å legge at meir pengar, seier Stig Johnny Buvik, som er salssjef i Flåm AS,

• Les også: Trur på god turistsesong

I siste halvdel av 2014 fall kroneverdien i forhold til dei store utanlandske valutaene.

Og sjølv etter at krona styrka seg torsdag i førre veke, må ein framleis betale om lag åtte og ei halv krone for kvar euro. Buvik trur det kan få fleire nordmenn til å feriere i Noreg.

• Les også: Disney-suksess skal gi klingande mynt på Vestlandet

– I og med at det og har blitt dyrare for nordmenn å reise ut av landet, så trur eg og at det kan få den effekten at fleire nordmenn vel å feriere i eige land fordi at kostnadane med å reise på ein utanlandsferie blir betydeleg høgare.

Ventar god sommar

Direktør for Hotel Alexandra, Richard Grov, er samd med Buvik i at svak krone lover godt for reiselivsnæringa og fortel at han ser konturane av ein god sommarsesong.

– Framfor ein sommarsesong bør og skal du vere optimist, og når det gjeld bestillingane våre for denne sesongen å ser dei svært bra ut.

Fem prosent vekst

I Innovasjon Noreg har dei også tru på ein god turistsesong. Fylkesdirektør for Sogn og Fjordane, Halvor Flatland, trur at den svake kronekursen saman med god internasjonal marknadsføring vil føre til eit godt år for reiselivsnæringa i fylket:

– I vår prognose for 2015 ventar vi på landsplan ein vekst i besøkstalet på fem prosent Me tanke på at det vi kan kalle «indrefileten av norsk reiseliv» ligg plassert hjå oss, så bør vi absolutt få vår del av den veksten.

Vêret avgjer

Dagleg leiar i Fjordane reisebyrå, Anne Oline Gullaksen, fortel at dei ikkje har merka nokon nedgang i talet på reisande etter at kroneverdien byrja å falle i fjor haust.
Ho trur det er andre ting enn kronekursen som avgjer kvar nordmenn legg ferien.

• Les også: Vil lokke turistar med uvêr - heile året

– Vi har ikkje hatt noko nedgang sidan det her byrja. Det som bestemmer når nordmenn reiser er i stor grad vêret, det er det ikkje tvil om.