– Vi kjem mest truleg, på neste årsmøte, til å kjempe hardt for at vi skal revurdere dei løyva i Førdefjorden.
Det seier Stian Jean Opedal Davies, ungdomskandidaten til Vestland Ap.
For Davies, som for mange andre, var fjorddeponi i Førdefjorden ei stor og viktig sak – og den saka det var mest usemje om under det første program- og nominasjonsmøtet til det samla Vestland Ap.
På møtet laurdag troppa også Sogn og Fjordane Natur og Ungdom opp for å aksjonere mot dumping av gruveavfall i fjorden.
Vil seie nei til nye søknader
Søndag vedtok Vestland Arbeidarparti følgjande punkt i fylkesprogrammet:
- Vil ikkje innvilge framtidige søknader om å deponere gruveavfall i sjø.
- Tilnærma full utnytting av ressursane i alle gruveprosjekt i regionen, slik at man unngår deponering av avgangsmasser i fjord/sjø.
- Det må greiast ut kva moglegheiter som finst for massar frå gruvedrift, som i større grad kan utnyttast til andre formål.
Opphavleg hadde programnemnda berre med det første punktet i sitt utkast. Det var Hordaland-delegat Reidar Staalesen som fremja dei to nye punkta.
– Dette er ein kjempesiger, og det mest tydelege svaret vi kunne kome fram til, seier Staalesen.
EIN SIGER: Hordaland-delegat i Vestland Arbeidarparti, Reidar Staalesen, er nøgd med vedtaket om sjødeponi.
Foto: Benedikte Grov / NRKTrekte punkt om Førdefjorden
Eit siste punkt i forslaget, som konkret handla om Førdefjorden, blei trekt tilbake: «Det innvilga utsleppsløyvet for deponering av gruveavfall i Førdefjorden må vurderast på nytt».
– Når vi gjekk konkret på Førdefjorden som eiga sak, oppfatta vi at det var eit ønske om å heller behandle dette som ei årsmøtesak. Det vi seier med dei andre punkta er at vi ikkje ønskjer å bruke sjø eller fjord som deponiområde, seier Staalesen.
– I Hordaland har vi eit samrøystes vedtak om at dette er ønskt politikk. I Sogn og Fjordane har det vore ein bevegelse. Når vi samrøystes fekk inn desse to kulepunkta i dag, i tillegg til det som alt stod i programmet, så er jo alle einige om at ein ikkje ønskjer å bruke fjordane som deponiområde, seier han.
Har respekt for løyvet som er gitt
Andrekandidat på fylkestingslista, Arve Helle, er fornøgd med vedtaket.
– Mi haldning er at ein skal ha respekt for at det er gitt eit løyve. Det viste møtet i dag at ein hadde. Det har heller ikkje noko i eit program for Vestland fylke å gjere, for desse forholda ligg til statlege instansar å vurdere.
