– Det er eigentleg litt galskap heile prosjektet, ler fotografen mens har gjer klart for nok ei fotoøkt.
100 år – 100 portrett
I atelieret sitt i Hydro sitt administrasjonsbygg i Storgata vekslar Ullebø på å ta bilete av pensjonistar, og nykomne flyktningar.
– På sett og vis er alle i Høyanger innvandrarar. Dei aller fleste har flytta hit for ein generasjon eller tre sidan. No når det er 100 år sidan industrien byrja å blomstre her, har det komme nye – flyktningane, seier Ullebø.
Om lag 120 menneske fordelt på fem gardsgrender budde opphavleg i det som bar namnet Høyangsfjord. Det var tilflyttarar som tok Høyanger frå jordbruk- til industrisamfunn for nøyaktig 100 år sidan. I fjor fekk tettstaden i Sogn – på kort varsel asylmottak. Skepsisen var stor.
No er 140 flyktningar er på plass. I tillegg har kommunen busett 55 flyktningar med fast opphald dei siste åra.
Draumar før og no
Det er desse Arve Ullebø vil portrettere side om side med bygdas eldste. Målet er å fotografere 100 høyangringar. Pensjonistar og unge, nye høyangringar. Saman med bileta vil det følgje ein liten tekst.
– Desse ber alle på ein draum. Eg vil portrettere dei, og så stiller eg eit par spørsmål om bakgrunnen og kva draum dei har for livet sitt, forklarer fotografen og legg til:
– Pensjonistane har forhåpentlegvis fått leve ut sin draum, mens dei unge flyktningane har ein draum om korleis livet skal bli.
Pensjonistar rosar initiativet
87 år gamle Hallrid Hegg er sjølv tilflyttar frå Lærdal. Ho er nøgd med korleis hennar eige liv vart, og stilte gladeleg opp då Ullebø spurte om å få fotografere ho og ektemannen Agnar.
– Det er viktig at vi tek godt i mot dei nye som er komne. Eg har snakka med fleire. Dei verkar å vere veldig trivelege, seier Hegg.
– Men eg vil jo helst ta meg godt ut, då, seier ho lurt.
Ektemannen Agnar rosar Ullebø for initiativet. 89-åringen meiner det er viktig at Norge opnar grensene for dei som treng hjelp.
– Det er nok mange som er skeptiske, men kva om Sverige hadde stengt grensa for oss under krigen? Det er noko å tenkje på.
Syriske Hamza: – Viktig for integreringa
For syriske Hamza Sheikho vart alle draumar lagt på vent, då den unge journalisten flykta frå krigsherja Syria. Planane om å studere drama er i det blå. No er han takksam for ei trygg seng i Høyanger. Sheikho trur Ullebø sitt fotoprosjekt kan slå positivt ut.
– Då Arve spurte var eg ikkje i tvil. Eg likar spesielt godt at han vil ha alle foto i svart-kvitt. Då skilnadene viska ut. Vi blir alle jamstilte. Eg trur dette prosjektet er viktig som ein del av integreringa mellom dei som har vore lenge i Høyanger, og vi som er nye, seier syraren.
Prosjektet har fått støtte frå både kommune og mottak. Planen er ei stor fotoutstilling i Høyanger i oktober. Arve Ullebø har saman med forfattar og tidlegare journalist Arve Sandal, også som mål å gi prosjektet ut i bokform.