– Eg trur dette vil føre til ei betydeleg betring av trafikktryggleiken, seier distriktsleiar for Utrykkingspolitiet på Vestlandet, Terje Oksnes.
I dag er det to UP-patruljar i Sogn og Fjordane. Ein i Nordfjord og ein i Sunnfjord, der sistnemnde også har jobba langs vegane i Sogn. Frå hausten av får Sogn si eiga patrulje. I tillegg blir det oppretta ei sivil UP-patrulje som mellom anna skal jobbe med etterretning knytt opp til mobile vinningskriminelle.
- Les også:
– Dei uniformerte bilane som er i Sogn og Fjordane i dag gjer ein veldig god jobb. Det er dyktige folk og det ser ut til at vi har fått tak i veldig gode folk på dei to nye patruljane. Dette vil ha stor betydning, seier Oksnes.
Spyttprøve skal stogge rusa førarar
Den sivile patruljen får base i Sunnfjord og skal reise rundt i fylket etter behov, fortel Oksnes.
– Dei har som primæroppgåve å ta ut farlege trafikantar som ikkje nødvendigvis berre har trafikklovbrot på samvitet, men som også driv med anna form for kriminalitet.
Dette kan til dømes vere personar som fraktar narkotika eller tjuvegods langs vegane.
Patruljen vil også vere utrusta med ein ny type rustest, apparatet Drugtest 5000. Ved hjelp av ei spyttprøve gir denne politiet raskt svar på om det er mistanke om at føraren er rusa på medikament eller narkotika.
– Berre i UP-distriktet Vest har vi ei dobling av rustekne i forhold til måltalet vårt, og dette skuldast det nye apparatet. Eg trur at det i Sogn og Fjordane vil bli avslørt mange fleire ruskøyrarar som brukar annan rus enn alkohol, seier Oksnes om kontrollaktiviteten framover.
- Les også:
- Les også:
Blir applaudert av Trygg Trafikk
– Politikontrollar er viktige for at folk skal køyre etter fartsgrensene, rusfritt og følgje trafikkreglane elles på ein god måte. Dette helsar vi hjarteleg velkommen, seier Audun Heggestad som er fylkessekretær for Trygg Trafikk i Sogn og Fjordane.
Heggestad trur ei dobling av talet patruljar vil ha ein tydeleg førebyggande effekt.
– Forsking viser at ser ein politibilar så held folk seg til fartsgrensene i større grad enn om ein ikkje ser dei.
- Les også:
Trygg Trafikk har stor tiltru til at bruken av måleinstrumentet Drugtester 5000 vil kunne stogge fleire farlege ruskøyrarar i trafikken.
– Du kan forvente at sjåføren av kvar hundrede bil du møter er rusa, det er ganske mykje. Dette apparatet kjem heilt sikkert til å plukke ut mange sjåførar i fylket, seier Heggestad.