Torsdag vart formannskapet i Førde orientert om dei ambisiøse planane. Fem utbyggjarar har levert skisser for korleis dei ser føre seg at bygget kan sjå ut.
Sandal poengterer overfor avisa at det ikkje har vore lagt opp til ein offisiell arkitektkonkurranse, men at utbyggjarane i første gang har blitt bedne om å komme med skisser som syner bygga utvendig og plassert i bybildet sentralt i Førde.
– Vi ønskjer å byggje eit nasjonalt fyrtårn for det nynorske språket som er pressa frå alle kantar av engelsk og bokmål, seier Sandal til Firda.
Positiv distriktsredaktør
Distriktsredaktør i NRK Sogn og Fjordane, Terje Gilleshammer, har tru på prosjektet.
– Ved at fleire bedrifter går saman i eit felles hus vil vi lære av kvarandre, vi vil bli meir kreative og vi får nyskaping. Det vil også bli lettare å hente inn krefter utanfrå gjennom at vi kan dele på utgiftene. Det vil også vil vere bra for trivselen, seier han.
Også Rasmus Mo, styreleiar for Sogn og Fjordane teater, er positiv.
– Eg har stor tru på «Nynorskens hus». Samlokalisering, nettverk og kunnskapsdeling er rette modellen for vekst i distrikta, seier han.
POSITIV: «Nynorskens hus» i Førde kjem til å fungere som ein magnet for nyskaparar, seier Rasmus Mo.
Foto: Arne Stubhaug / NRK– Vil fungere som magnet
Mo har også hatt ei sentral rolle under etableringa av Campus i Sogndal, eit prosjekt som har hatt sto suksess.
– Det er no 47 bedrifter og 830 tilsette ved Campus i Sogndal, langt meir enn vi hadde drøymt om. «Nynorskens hus» i Førde kan bli litt av det same og vil fungere som ein magnet for nyskaparar, seier han.
Forutan NRK, Firda og Sogn og Fjordane teater har verksemder som Selja Forlag, Rein design, Findriv, Rom for ord og Rakkar og signalisert at dei kan tenkje seg å vere med i «Nynorskens Hus».
Neste trinn i prosessen vil vere å leggje fram prospekta for eigarane av Firda, Amedia, og NRK sentralt.
