– Det var ei stor lette å kome hit. Mykje stillare og rolegare. Her kan eg slappe av, seier Karl Frederick Shanks som vart lagt inn på Førde sentralsjukehus med lungebetennelse. Først på fleirmannsrom, før han vart plassert på einerom.
Helse Førde er berre eit av fleire helseføretak som dei neste åra skal investere milliardar i ombygging og nybygg.
Det slitne bygget frå 1979 skal moderniserast. Det siste året har sjukehuset bygd opp eit pasientrom. Ein modell, som har vekt interesse blant andre helseføretak. Einerommet blir den nye malen når blokka skal byggast om i 2024.
– Den største fordelen er at vi får tilby kvar pasient meir individuell behandling. Vi sikrar teieplikt på ein langt betre måte. Vi kan også skjerme pasientar som er urolege. I tillegg har vi ein vekst av multiresistente bakteriar som gjer at behovet for einerom er aukande, seier seksjonsleiar Randi Hove på medisinsk sengepost.
Større plass
I einerommet er det fleire godt synlege endringar. Ei stor skyvedør til badet gjer det lettare å kome til og frå. Avstanden mellom toalett, vask og handtak har blitt betre, som gjer at det er lettare for pleiarar å hjelpe til.
På sengerommet er lyset heilt annleis enn på fleirmannsrommet og lufta er betre. Ei ekstra seng for pårørande er montert inn i veggen og kan lett leggast ned.
– Pasientane spør ofte om å få kome på einerom, og spørsmålet dukkar ofte opp allereie i akuttmottaket. Det er ei hard prioritering for personalet å vurdere kven som skal få tilgang til dei få eineromma vi har tilgjengeleg, seier Hove.
Fleire byggeprosjekt
Sykehusbygg har investeringsplanar på rundt 10 milliardar kroner årleg og skriv at dei no alltid anbefaler einsengsrom framfor fleirsengsrom.
Dei neste åra er det store byggeprosjekt på gong i sjukehus-Noreg, som krev investeringar på fleire titals milliardar.
- Nye Stavanger universitetssjukehus.
- Nytt klinikkbygg Radiumhospitalet med protonsenter.
- Aker og Gaustad
- Nye Drammen sjukehus
- Sjukehuset Nordmøre og Romsdal
- Nytt sjukehus på Helgeland
– Vi gir ikkje pålegg om at helseføretaka skal gjere akkurat som vi seier, men vi anbefaler sterkt at dei vurderer varige einerom, seier statssekretær Anne Grethe Erlandsen (H).
Ho seier dette er den klare trenden både i Noreg og resten av verda.
– Det er viktig når pasientar ligg på sjukehus at dei får ligge i fred og at dei kan ha sine pårørande rundt seg. Og full merksemd frå personalet.
Åtvarar
Det siste året har det kome åtvaringar mot at gigantinvesteringane kan gå utover pasienttryggleiken. Norsk Sykepleierforbund er i utgangspunktet positiv til einerom, men fryktar at satsinga vil føre til større belastning på dei tilsette.
– Det er viktig at ein allereie no tek høgde for å auke bemanninga. På eit fleirmannsrom kan ein sjukepleiar ha oversikt over fire pasientar. Dersom du spreier dei til fire enkeltrom så greier ikkje den eine sjukepleiaren å vere på fire rom samstundes. Det kan skape utfordringar når det oppstår akutte situasjonar, seier fylkesleiar Oddgeir Lunde i sjukepleiarforbundet i Sogn og Fjordane.