Det vart bom stopp for fem av vogntoga som er tilknytt Cirkus Agora då Statens vegvesen hadde kontroll på Fodnes ferjekai i dag.
– Eg synest det er skummelt at folk vel å køyre med så dårleg utstyr, seier overingeniør og kontrollør i Vegvesenet, Torgeir Bang.
Han var med og gjorde trafikkontrollen i dag, og kan fortelje at vogntoga ikkje hadde køyrelys eller bremselys bak.
– Å køyre utan lys bak på bilane gir høg risiko i tunnelar, seier Bang.
Tok fire timar å ordne
Torgeir Bang i Vegvesenet fortel at dei som vart stoppa sjølve sa at alt var i orden då dei byrja å køyre. Her stiller han seg noko undrande.
– Feila var alvorlege og ut frå kva eg såg så var det ikkje enkle feil. Dei brukte fire timar på å ordne lysa. Då fekk fire lastebilar køyre vidare. Den femte måtte bli ståande, seier han.
- LES OGSÅ:
- LES OGSÅ:
Meier dei følgjer trafikkreglane
– Det har alltid vore noko styr med sirkus, men vi følgjer trafikkreglane, seier sirkusdirektør Jan-Kjetil Smørdal.
Han seier at vogntoga som blei stogga ikkje er Cirkus Agora sin eigedom.
– Vår bilpark er i orden, seier sirkusdirektøren.
– Men kva tenkjer du om at artistar som er tilknytt sirkuset køyrer i bilar som ikkje er godkjende på vegane?
– Altså, det blei jo retta opp der og då. Vi har dyktige mekanikarar og dei fekk jo køyre vidare, seier Smørdal.
Han fekk sjølv ei bot på 8000 kroner fordi bilen hans mangla bombrikke.
– Det er eg fullstendig klar over. Brikka er bestilt, men har ikkje kome endå. Vi undersøker årsaka til kvifor den manglar no. Det kan jo hende at bompengeringen i Bergen har gjort ein feil, seier Smørdal.
LES OGSÅ:
Rakk førestillinga i Øvre Årdal
Sirkuset var på veg til Øvre Årdal for å ha førestilling der då dei blei stogga. Torgeir Bang i Vegvesenet seier han håper dei rakk fram i tide.
– Vi vil ikkje stoppe eit sirkus. Vi vil berre ha det trygt på vegane våre, seier han.
Og Bang vil også gi sirkusgjengen litt honnør.
– Det skal dei ha. Dei forstod problemet, var kreative og stod på for å få ordna ting.
- LES OGSÅ:
Ein glad mann
Smørdal er glad for å få nokre rosande ord frå Vegvesenet. Sett bort frå problem med køyretøya som er tilknytt sirkuset er han stort sett ein glad mann for tida.
– Det går kjempebra på turne. Eg har aldri hatt det så bra i livet. Det var fullt hus i går i Hermansverk, fullt i Gaupne og fullt i Vik. Det er topp. Og publikum er kjempenøgde, seier Smørdal.
– Er sikkerheita betre for utøvarane i sirkuset enn på vegane?
– Overhovud ikkje. Vi fekk faktisk ros frå vegvesenet for å køyre varsamt i dag. Vi set sikkerheit i høgsete og gjer så godt vi kan. Så håper eg at alt går bra, avsluttar Smørdal.
LES OGSÅ: