– Oppmøtet i Førde er betre enn dei fleste andre plassar i landet. Foreininga har så stort engasjement at det er ein fryd å vere her, seier Joop Cuppen, prosjektleiar i Seniornett Norge.
Seniornett er ei foreining med lokale klubbar, som tilbyr datakurs for eldre rundt om i landet. Monrad Kolstad er med i styret, og kursar også deltakarane i Førde. No er dei i gang med å starte opp nytt kull, og Kolstad er fornøgd med oppmøtet.
– Det kom veldig mange, slik det pleier å gjere kvar haust. Vi har snart ikkje plass til fleire, seier han spøkefullt.
Frå før har Seniornett Førde omlag 80 medlemar.
- Les også:
Viktig med datakompetanse for eldre
Prosjektleiar Joop Cuppen er på besøk i Førde denne dagen, i håp om å motivere og inspirere dei frammøtte. Han reiser ofte rundt i landet og besøker dei lokale klubbane, og peikar på fleire grunnar til at datakompetanse er vesentleg også for dei eldre.
– Omlag 20 prosent av det norske folket har overhovudet ingen eller altfor dårleg kompetanse på data, og det gjer at dei ikkje kan henge med i samfunnet som blir meir og meir digitalt, seier han.
- Les også:
Han har inntrykk av at arbeidsgjevarar ikkje bryr seg særleg om at eldre arbeidstakarar ikkje kan nok data.
– Sidan dei snart skal gå av, er det liksom ikkje arbeidstakaren sitt problem lenger, seier han.
– Eg reiser rundt i heile Noreg, og merkar at veldig mange eldre er einsame. Dei klarer ikkje å delta i det sosiale slik som før. Ved hjelp av internett og sosiale medium kan ein ta opp igjen det sosiale nettverket, utan å forlate huset.
Ser seg nøydde til å lære
Gerd Birkeland, Ellinor Hårklau og Solfrid Årseth er nysgjerrige på korleis kurset er lagt opp.
Solfrid Årseth har aldri slått på ei datamaskin før, og startar dermed heilt på bar bakke.
– Vi er nesten nøydde til å lære oss dette. Eg vil gjerne ha ei epost-adresse og lære å kunne betale rekningar på nett, fortel ho.
Overtydde tilhøyrarar
Møtet startar, og Joop Cuppen og Monrad Kolstad fortel mellom anna at det er deltakarane sjølv som bestemmer kva dei skal lære på kurset.
–– Det er viktig å få hjelp på sitt eige nivå, og å komme seg vidare. Dersom ein ikkje får hjelp til å løyse problem med datamaskina, prøver ein kanskje aldri igjen, seier Cuppen.
Etterpå har dei tre damene bestemt seg for å melde seg på.
– Dette var inspirerande, seier Gerd Birkeland.