Over halvparten av dei spurde i Førde meiner forslaget er dårleg, medan innbyggarane i Flora er aller mest kritisk.
– Har vi ikkje betalt nok? Det er alltid Florø-folk som må betale for det i Førde, seier to damer NRK treff på gata i Florø.
Tykkjer det er urimeleg
Det blir i første omgang lagt opp til fem bomstasjonar rundt Førde for å delfinansiere Førdepakken. Prisen er sett til 18–20 kroner for ei passering.
Ei fersk meiningsmåling på oppdrag av Frp, viser at haldninga til nærare 70 % av dei spurde i Flora kommune er at det er eit dårleg forslag med bompengar for å betra infrastrukturen i Førde sentrum.
I Førde er 51,2 prosent negative til forslaget og i Høyanger er talet 44 prosent.
– Dette overraskar meg ikkje i det heile teke. Eg sa tidleg at det er urimeleg at innbyggjarane i Flora nærast må betale for å komme seg ut av fylket, seier ordførar Bengt Solheim-Olsen (H) i Flora.
- LES OGSÅ:
- LES OGSÅ:
Det same meiner fylkesleiar i Framstegspartiet Frank Willy Djuvik som har bestilt meiningsmålinga. Den same meiningsmålinga viser at nær 42 % av dei spurde i heile fylket meiner bompengar er eit dårleg forslag.
– Så lenge vi har betalt inn så mykje i vegrelaterte skattar og avgifter, er det urimeleg at vi skal betale ein gong til i bomring. Det finst moglegheiter til å finansiere dette utan bompengar, om det er politisk vilje til det, seier Djuvik.
Førde-ordførar er ikkje samd
Men dette er Førde-ordførar Olve Grotle ueinig i. Han seier at Førde kommune ikkje vil endra planen om bompengar.
– Vi er nøydde til å ty til noko som er ulempe, for å oppnå ein stor positiv ting som er å ordne trafikken i Førde dei neste 20–30 åra. I tillegg er vi nøydde å halde oss til det to bystyre har sagt, seier han.
- LES OGSÅ:
- LES OGSÅ: