Røynd lensmann slaktar politireforma

Regjeringspartia, saman med Venstre, KrF og Ap, sikra søndag kveld fleirtal for reforma som mellom anna inneber at politidistrikta i Hordaland og Sogn og Fjordane blir slått saman. Vidare vil mange av dagens 22 lensmannskontor i fylket truleg bli lagde ned.

Lensmann Åge Løseth kjem med klar tale:

– Dette er ille og eg er skuffa. Alle honnørorda og flosklane om kor fint dette skal bli har eg lite tru på. Eg er djupt uroa over framtida for nærpolitiet, seier han.

• Les også: Sogn og Fjordane politidistrikt er historie

Forventar at politiet er til stades

Leiar i Justiskomiteen på Stortinget, Hadia Tajik frå Arbeidarpartiet, har følgjande kommentar til kritikken.

– Eg har veldig stor respekt for tilbakemeldingane frå Sogn og Fjordane. Fylket har utfordrande geografi og topografi som eg føreset at også den nye politimeisteren har forståing for. Vi forventar at politiet skal vere til stades der folk bur også Sogn og Fjordane og i Fjaler, seier ho.

• Les også: – Politireforma startar i heilt feil ende

(Artikkelen held fram under biletet.)

Uroa

Dei fem partia har vorte samde om at 90 prosent av innbyggjarane i kvart politidistrikt ikkje skal ha meir enn 45 minutt til politiet sin tenestestad. Løseth meiner dette er urovekkjande for Sogn og Fjordane.

– Når vi ser politidistrikt vest under eitt med den store befolkningskonsentrasjonen rundt Bergen, betyr det i praksis at mange lensmannskontor i vårt fylke kan bli lagde ned utan at ein bryt kravet. Det er urovekkjande, seier han.

Frp nøgd

Ulf Leirstein, medlem i Justiskomiteen for Framstegspartiet, meiner på si side at reforma vil vere veldig positivt for norsk politi.

Søndag kveld då det var klart at Frp, saman med Høgre, Venstre, KrF og Ap, hadde vorte samde, fortalde han kor nøgd han var med reforma.

Løseth er av ei heilt anna oppfatning.

– Politiarbeidet i fylket vårt vil bli dårlegare. Det er ille, seier han.