NRK Meny
Normal

Ordførar tar oppgjer med ordførar-livsstilen

Leikanger-ordførar Jon Håkon Odd tar no grep etter at ordførar-livsstilen og ferielivet viser att på magen. No ser han etter tolmodige turkameratar.

Jon Håkon Odd, Leikanger

UT PÅ TUR: Jon Håkon Odd var på tur i helga og innsåg at han no må gjere noko med livsstilen.

Foto: Privat

Ein kvardag med møter, kringler og bufféar kan etter kvart bli tungt for kroppen. Denne dietten er nok kjend for mange ordførarar, og for ordføraren i Leikanger, Jon Håkon Odd, har det no blitt nok.

Søndag posta han eit innlegg på Facebook der han seier at han skal kutte 20 prosent av vekta si. I innlegget etterlyser han turkameratar i same situasjon, og som kan vere tolmodige turkameratar når kutta skal gjennomførast.

– Det handlar mest om ein ordførar som var ute på nokre turar no i helga og merka at det ikkje gjekk så fort som han ville, seier Jon Håkon Odd.

Vil ikkje på ergometersykkel

«Operasjon valflesk er i gong», seier han på Facebook, sjølv om det er lenge til neste val.

– Det er lite valtankar enno. Det handlar om at eg ser at eg må gjere noko med både livsstil og magefeitt, men eg er ikkje typen til å gå på eit treningssenter, seier ordføraren.

Han ser på dette som ein sjanse til å både komme i betre form, gå ned i vekt, komme ut i flott natur, og møte nye turfeller.

Odd trur ikkje det er fare for ein ordførar-epidemi, men at ein skal tenke seg om når det er mange konferansar.

– Møtematen har endra seg

Arve Helle

BETRE NO: Tidlegare Fjaler-ordførar, Arve Helle, merka betring i møte-dietten gjennom tolv år som ordførar.

Foto: Johan Moen / NRK

Arve Helle var ordførar i Fjaler i tolv år, og har derfor lang erfaring med møtematbordet.

– Eg hadde nokre utfordringar der. I periodar var det travelt, og det er samtidig god tilgang på mat, seier han.

Men han merka ei endring i løpet av si fartstid.

– Møtematen har endra seg. Der det før var wienerbrød bruker det no å vere frukt, så det er betre no enn det var tidlegare, seier han.

Når møtesesongen byrjar igjen, kan det vere ei løysing for Odd å fremje forslag om sunnare møtemat. Men det er ikkje berre enkelt.

– Eg har nokre kollegaar som eg er veldig redd for å ta wienerbrøda frå, så eg veit ikkje om eg tør det, seier ordføraren.

Ordførarar saman på tur

Ordføraren jublar over opprykk

INVITERER: Ordførar-kollega Jarle Aarvoll i Sogndal, inviterte sporenstreks til ordførartur i Sogndalsdalen.

Foto: Stine Kyrkjebø Johansen / NRK

Leikanger-ordføraren fekk sporenstreks ein SMS frå sin ordførar-kollega i Sogndal, etter at han hadde lagt ut innlegget på Facebook.

– Den første som inviterte meg med på tur var naboen min i aust, Jarle Aarvoll, som ville ha meg med på fjelltur i Sogndalsdalen.

Og no kan det hende at eit ordførar-turlag ikkje er så langt unna.

– På ordførarsamlingane håper eg no å bli invitert med på tur, og ikkje berre på restaurant. Det er mange konferansar med hotell-lønsjar, og på buffé krevst det ein del sjølvmeistring, ler Jon Håkon Odd.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.