Tunnelen på fylkesveg 616 har vore heilt stengt, og deretter berre vore open for kolonnekøyring, sidan ei tankvogn med 16 500 liter bensin eksploderte i tunnelen i midten av juli.
Frå klokka 16 i dag, var det endeleg fri ferdsle.
– Men farten er redusert fordi vi manglar fire tunnelvifter i nordenden. Vi ventar å få viftene på plass i vinter og då blir det også normal fart, seier seksjonsleiar Margot Åsebø i Statens vegvesen.
Sikrare tunnel
Tunnelen fekk store skader i det som vert rekna som landets største tunnelbrann. Åsebø fortel at siste kostnadsoverslag for reparasjon av tunnelen og kolonnekøyring er på 57 millionar kroner.
- Les også: Stettar nye tunnelføreskrifter
Åsebø seier tunnelen no er betre og sikrare enn den var før.
– Vi har fått montert tettare med naudstasjonar og evakueringslys, så den blir tryggare. Det blir også nye bommar på utsida av tunnelen etter jul. Desse vil gå ned for å hindre trafikk inn i tunnelen dersom eit brannsløkkingsapparat blir fjerna, seier Åsebø.
Rosar reisande
Seksjonsleiaren rosar pendlarane for å ha vore tolmodige gjennom ei utfordrande tid.
– Mange har fått ein veldig tungvint kvardag, lenger reiseveg og mykje venting. Men eg tykkjer folk har vore skikkelege tolmodige, seier ho og legg til at kolonnekøyringa har fungert fint.
– Vi tok omsyn til innbyggjarane i Bremanger og dei som pendlar internt i kommunen. Totalt har vi hatt ti kolonner om dagen og stengt om natta, avsluttar ho.