Fiskeridirektør Liv Holmefjord tilrår at Fiskeridirektoratet skal ha tre regionar i framtida, mot sju regionar i dag. Ho tilrår også at direktoratet skal vere representert på 19 stadar langs kysten, mot 28 i dag.
– Dette har vi gjort i samband med at vi ser framover på kva utfordringar fiskeriforvaltninga har framover og korleis vi kan stå godt rusta til å møte dei, seier Holmefjord.
- Les også:
Blir fiskerikontor
Ho meiner omorganiseringa ikkje betyr ei svekking av regionane til fordel for hovudkontoret i Bergen. Men om fiskeriministeren går inn for tilrådinga hennar, blir det ei endring når det gjeld regionkontora.
– Fiskeridirektoratet har i dag både regionkontor og lokale fiskerikontor. Dei som i dag er regionkontor og eventuelt blir ikkje blir vidareført som det, dei held fram som fiskerikontor med eit godt fagmiljø der, seier ho.
– Kva er grunnen at Måløy ikkje skal vere regionkontor?
– Vi har sett på ein del kriterium som kan vere viktige når vi skal lokalisere eit regionkontor. Det går til dømes på nærleik til fiske- og havbruksmiljø, relevant kompetansemiljø og korleis sikre god samhandling med andre aktørar.
Vil merkast i Måløy
Kontoret i Måløy har i dag 26 tilsette. Direktør Vidar Ulriksen ved regionkontoret, trur ei flytting frå Måløy til Bergen vil få konsekvensar for dei tilsette.
– Du gjer ein reduksjon i Måløy og ei utviding i Bergen. Alternativet med tre regionar inneber jo at regionkontoret i Bergen skal styre dei fire kontora vi har i sør i dag, deriblant Måløy. Så det kjem til å bli ein heilt annleis situasjon for dei som skal sitte i leiinga, seier han.
Vil merke endringar på kort sikt
På kort sikt trur ikkje fiskeridirektør Liv Holmefjord at det blir store endringar i bemanninga ved kontoret i Måløy.
– Over tid vil dette utvikle seg, avhengig av kva oppgåver direktoratet har, korleis næringa utviklar seg og korleis fagmiljø blir bygd opp. På kort sikt vil det kanskje ha noko å seie på leiarnivå, men over tid har det betydning på andre område.
– Betyr dette at det på lengre sikt vil det ryke fleire stillingar ved eit eventuelt fiskarkontor i Måløy?
– Det kjem an på korleis fiskeriforvaltninga utviklar seg. Sjømatnæringa har potensial for å vekse framover. Det vil bety ei sterk forvaltning og det er ikkje gitt at det blir nedbygging. Men dette er vanskeleg å seie akkurat no, seier ho.
- Les også:
Stortingsrepresentant Bjørn Lødemel frå Høgre seier han er svært skuffa over flyttinga av regionkontorfunksjonen.
– Vi har eit godt kompetansemiljø i Måløy, og det er ei klar målsetting for Sogn og Fjordane Høgre at kontoret skal forsterkast og vidareutviklast gjennom omorganiseringa av Fiskeridirektoratet, seier han.