– Vi meiner utskrivinga var fagleg uforsvarleg. Pasienten var framleis svært sjuk ved utskriving, seier fylkeslege Per Stensland.
Dei har vurdert behandlinga som pasienten fekk, og meiner at behandlinga på fleire punkt ikkje var i tråd med god praksis. Samarbeidet med kommunehelsetenesta var ikkje tilfredsstillande, og heller ikkje pasienten sin eigen medverknad i behandlinga var god nok. Pasienten tok livet sitt kort tid etter at han vart utskriven frå døgnbehandling.
– Vurderingane totalt sett var ikkje fagleg forsvarlege. Dette er alvorleg, seier Stensland.
Skal sjå om det er forbetringspotensial
– Dette er ei lei sak, og vi har vondt av familien som måtte gjennomgå dette, seier konstituert klinikkdirektør ved psykiatrisk klinikk i Helse Førde, Svein Ove Alisøy.
- Les også:
Han vil ikkje gå i detalj om saka, men seier dei vurderte risikoen for sjølvmord før pasienten vart skriven ut. Personalet som vurderte pasienten hadde også opplæringa og kvalifikasjonane som er påkravde.
– Vi har gått gjennom saka på avdelinga for å ta lærdom. Det er dessverre ikkje mogleg å førebygge alle sjølvmord. Det vart gjort ei vurdering, og vi har ingen garanti for at det ikkje kan skje, seier Alisøy.
Meiner Helse Førde de har gjort ein feil?
– Vi tek det fylkeslegen seier til etterretning. Vi har gått grundig gjennom saka på avdelinga for å ta lærdom av den, og for å sjå om det er forbetringspotensial. Det vil det alltid vere.
Andre saka på kort tid
Fylkeslegen seier dei vil gå i dialog med helseføretaket for å hindre liknande svikt i framtida. Samstundes er det andre gong på kort tid at Helse Førde får refs frå Fylkeslegen i ei sak som gjeld forsvarleg helsehjelp i psykiatrien.
– Det gjer saka berre meir alvorleg. Det understrekar behovet for ein gjennomgang av rutinane, seier Stensland.
Alisøy er klar på at dei følgjer dei nasjonale retningslinjene, og har rutinane på plass.
– Slike saker skjer sporadisk. Det kan vere tilfeldig at det skjer tett på kvarandre, seier han.