Johannes har strikka i over 70 år

Han byrja å strikke i 10-årsalderen.

– Eg hugsar eg sat i senga og prøvde meg på ei 8-bladrose. Då var eg ikkje gamle karen, fortel Johannes Ness.

Skilde seg ut

– Var det uvanleg at gutar strikka på den tida?

– Ja. Eg var vel åleine om det.

– Fekk du noko merksemd fordi du var ein gut som var flink til å strikke?

– Nei, det gjorde eg ikkje. Eg trur ikkje så mange visste om det. Eg gjorde ikkje nokon merksam på det.

No har han strikka i over 70 år. Johannes strikkar selbuvottar, genserar og strikkesokkar.

– Han strikkar veldig jamt og fint, seier Aud Ness, kona til Johannes.

Samarbeider med kona

No har Johannes nokon å dyrke interessa med. Denne vinteren har ekteparet strikka sju genserar i lag. Johannes har strikka ermane og Aud har strikka bolen på genserane.

Begge driv i tillegg mykje med ulike typar brodering.

– Det er jo veldig spesielt det syarbeidet kona mi driv med, hardangersaum, seier Johannes.

Vinteren 1962 til 1963 var Johannes sjukmeldt. Då trong han noko å gjere på medan han skulle bli friskare.

– Den vinteren lærte Aud meg hardangersaum og hjelpte meg i gong med å brodere ein duk, fortel Johannes.

Paret syns det er kjekt å samarbeide om handarbeid.

– Men det blir jo ein del krangling då, seier Johannes lurt.

– Nei, eg trur nok det går bra, ler Aud.

Multikunstnar

Det er ikkje berre strikking og brodering 82-åringen driv med. Han er nemleg også ein kløppar i treskjering. Han har blant anna laga 16 hardingfeler, ein modell av skipet Christian Radich og veldig mange skoskeier.

Aud fortel at det er skoskeier over heile verda som Johannes har laga. Johannes gir skoskeiene vekk som gåver, og slik har dei enda opp i land som USA, Kenya og England.

– Treskjering har eg etter far min. Han vart veldig glad i treskjering då han vart pensjonist, seier Johannes.

Han og kona Aud har og drive mykje med idrett. No syng dei i saman i seniorkor og er begge instruktørar i seniordans.

– Eg er pensjonist og må jo ha noko å gjere på. Må ha eit spøt på handa, ler Johannes Ness.