Frida Melvær (H), stortingsrepresentant og medlem av Justiskomiteen, var blant dei som jubla.
I ei pressemelding fortalde ho at Vest politidistrikt er blant budsjettvinnarane med 17 nye stillingar.
Men verkelegheita er ganske annleis enn regjeringa prøver å gi inntrykk av, om ein skal tru politisjef i Sogn og Fjordane, Arne Johannessen.
– Det er heilt rett at alle får meir pengar. Men utfordringa er at staten gir med ei hand og tar med den andre, fortel han.
Mindre pengar å rutte med
LEDIGE: På grunn av pengemangel har politisjef Arne Johannessen ti stillingar ståande ledige. Fleire kan det bli. – Skal vi kome i mål med budsjettet i 2019, må vi truleg late endå fleire stillingar stå ledige, seier han.
Foto: Oddleif Løset / NRKDette forklarar han med at regjeringa har pålagt politiet å drive meir effektivt og at staten tek tilbake den økonomiske gevinsten når dei lukkast med å drive meir rasjonelt.
Samstundes har distriktet fått ekstra kostnader med omlegging til færre passkontor og ombyggingar av bygningar.
– Summen av dette betyr at for meg som leiar i Sogn og Fjordane, så har eg mindre pengar til disposisjon for drifta av polititenestene i 2019 enn i 2018, seier Johannessen.
To av tre stillingar ledige
I hans distrikt skulle politiet ha sysselsett 147 årsverk, men Johannessen har berre pengar til 138. Med andre ord må ti stillingar stå ledige på grunn av pengemangel i 2019.
Ein av kommunane som merkar pengeproblema på kroppen er Bremanger. Her vil to av tre stillingar ved det lokale lensmannskontoret stå tomme i år, skriv Firdaposten.
– For det første må eg berre beklage. Eg er samd i at det er ei dårleg utvikling. Det går sjølvsagt ut over etterforsking og andre prioriterte område. Dette er ei stor uro som råkar ganske mange kommunar.
Vil ikkje friskmelde
FRISKMELDER IKKJE: – Det er positivt at distrikta får 100 millionar meir, men eg friskmelder ikkje politidistrikta med desse pengane, seier Nasjonal leiar i Politiets Fellesforbund, Sigve Bolstad.
Foto: Martin H. W. Zondag / NRKNasjonal leiar i Politiets Fellesforbund, Sigve Bolstad, stadfestar at alle landets politidistrikt opplever det same som Johannessen skildrar.
– Målet med reforma er eit lokalt forankra politi som skal vere til stades og tilgjengeleg der folk bur. Blir det slik at dei attverande lensmannskontora ikkje klarer å halde oppe ein forsvarleg aktivitet eller at dei kommunane som har mista kontora sine ikkje opplever at politiet er tilgjengelege, så er reforma ein flopp.
Vil høyre på politiet
UTFORDRANDE: – Vi må hugse at politireforma er under arbeid, og det vil alltid vere utfordringar rundt ei så stor reform som dette. Det viktigaste er at politiet opplever ho som god, seier Frida Melvær.
Foto: Ole Kollstrøm Heilevang / NRKMelvær seier det er opp til politidistrikta å fordele pengane til sine lensmannskontor.
– Det er politiet sitt ynskje at politikarane ikkje skal leggje nokre føringar på kva dei brukar pengane til.
No vil Melvær møte Johannessen for å høyre på kva innspel han har.
– Det er viktig med tilbakemeldingar om korleis politireforma verkar ute i distrikta, og eg skal vere lydhøyr og sjå om det er ting med reforma som må justerast.
