NRK Meny
Normal

Håpar Florø-operatørane følgjer med til Bergen

Operasjonssentralen i Florø vert slått saman med Bergen mot slutten av året, men politimeisteren vil ha operatørane med vidare.

Kaare Songstad

LOKALKUNNSKAP: Politimeister Kaare Songstad i Vest politidistrikt, seier lokalkunnskap om Sogn og Fjordane vil bli prioritert under opplæringa av operasjonssentralsoperatørar, i tida fram mot samanslåinga av sentralane i Bergen og Florø.

Foto: Simen Sundfjord Otterlei / NRK

– Vi skal gje alle skikkeleg opplæring i forkant, slik at operatørane i Bergen kjenner Sogn og Fjordane godt nok. Eg har også eit håp om at nokre av operatørar som i dag jobbar i Florø følgjer med til Bergen, seier politimeister Kaare Songstad i Vest politidistrikt, på spørsmål om korleis dei som skal betene den nye operasjonssentralen i Bergen, skal ha nok lokalkunnskap om Sogn og Fjordane.

8. november er datoen det skal bli ein operasjonssentral for Vest politidistrikt, mot to som det er i dag.

Reknar med alle får tilbod

Lokallagsleiar i Politiets Fellesforbund for Vest politidistrikt, Kjetil Rekdal, seier dei enno ikkje veit heilt kva som skjer med dei som i dag jobbar i Florø.

– Det er ein prosess vi står midt i no og vi kan ikkje garantere at alle som jobbar i Florø får tilbod om å vera med over, men vi går ut ifrå at det vil skje, seier Rekdal.

Kjetil Rekdal UNIO

LOKALLAGSLEIAR: Kjetil Rekdal er leiar i Politiets Fellesforbund i Vest politidistrikt.

Foto: Hommedal, Marit / NTB scanpix

Han poengterer at dei som sitt i Florø har ein kompetanse dei vil trenge på den nye operasjonssentralen som skal dekke både Hordaland og Sogn og Fjordane.

– Det er viktig at dei som sitt på operasjonssentralen har lokalkunnskap og dei som no sitt i Florø har det. Eg håpar dei har eit ønske om å følgje med over til Bergen, seier Rekdal.

Politimeisteren seier folk i Sogn og Fjordane ikkje treng å frykte at operasjonssentralen forsvinn frå fylket.

– Dei som sitt på sentralen i Bergen skal styre ressursane på bakken, og dei er på bakken i Sogn og Fjordane. Vi satsar på å fleire ressursar der i åra framover, og eg er ikkje redd den lokale forankringa skal forsvinne, seier Sognstad.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.