Onsdag kveld handsama utvalet forslaget til kuttliste for samferdslesektoren, ein sektor som skal stå for 130 av dei 224 millionane fylkeskommunen må kutte fram mot 2019. 130 millionar kroner vil mellom anna bety kutt i bussruter og båtruter, og mindre pengar til vegvedlikehald og drift av vegane.
I tillegg er mange fjellovergangar utsette. Fylkeskommunen kan spare 8,7 millionar på å stenge Hol-Aurland og Årdal-Tyin om vinteren. Basert på eit forslag frå Høgre og Olin Johanne Henden vedtok hovudutval for samferdsle i kveld at alle moglegheiter for å unngå vinterstenging av desse fylkeskryssande fjellovergangane må undersøkast:
"Dette er drastiske forslag som vil ha store, negative konsekvensar for næringsliv, kommunar og privatpersonar. Hovudutval for samferdsel ber fylkeskommunen om å gå i dialog med Buskerud og Oppland fylkeskommune, for å sjå om ein kan finne løysingar for å unngå vinterstenging"
– Smertefullt, alvorleg, dramatisk
I forslaget til kuttliste ligg vinterstenging av Hol-Aurland og Tyin-Årdal inne som eit tiltak nivå 3. Nivå 3 vil seie at kutta først blir aktuelle i 2018 og 2019. Dette er også kutta som samferdslepolitikarane vegrar seg mest for å gjere: «smertefullt», «alvorleg» og «dramatisk» var formuleringar brukt under møtet i kveld.
– Så alvorlege at vi eigentleg ikkje ynskjer å ta borti dei, sa utvalsleiar Arnstein Menes under møtet.
Etter møtet utdjupa Menes.
– Viss innsparingskravet står seg fram mot 2019 må vi også gjere kutt på nivå 3, men vi håpar i det lengste å klare oss med nivå 1, og kanskje nivå 2.
Her er kutta for 2016 og 2017
Nivå 1 er kutt samferdslepolitikarane ser for seg å gjere i 2016 og 2017. På dagens møte kom dei fram til 20 punkt på nivå 1, som til saman vil spare inn 25,9 millionar.
Her er nokre utvalde tiltak som skal spare pengar på nivå 1:
- Samanslåing av skuleskyssruter – lengre reiseveg for nokre elevar.
- Nokre lokale bussruter blir nedlagde.
- Færre bussavgangar på regionale ruter og fylkeskryssande ruter.
- Færre avgangar på lokalbåtane.
- Buss og båt blir dyrare.
- Ferje blir dyrare.
- Skuleskyss mellom Hardbakke og Mjømna/Austrheim for elevar på vidaregåande skular blir kutta.
- Fure ferjekai blir lagt ned.
- Mindre båt på Sognebåten
- Fire vegstrekningar blir vinterstengde tidlegare om hausten enn i dag.
- Det blir slutt på kolonnekøyring Hol-Aurland.
- Trygt heim for ein 50-lapp blir til trygt heim for ein hundrings eller tohundrelapp, avhengig av alder.
Alle kutta skal gjerast som enkeltvedtak, og ingen kutt frå prioriteringslista vart gjort i dag. Her kan du sjå heile lista over kutt på nivå 1, 2 og 3.