Fylkesordføraren: – Indre Nordfjord har ikkje fått mindre enn andre område

– Eg føler at vi har prioritert Nordfjord til liks med dei andre regionane. Vi har prioritert viktige prosjekt i Nordfjord, seier fylkesordførar Jenny Følling (Sp).

Stryn og Hornindal vurderer samanslåing med sunnmørskommunane Ørsta og Volda, og ordførar Stig Olav Lødemel (H) i Hornindal ser gjerne at hans kommune blir ein del av Møre og Romsdal.

• Les også: Fylkesgrense ikkje til hinder for storkommune

– Ser ikkje verdien av Nordfjord

Etter å ha deltatt på eit felles kommunestyremøte for kommunane Ørsta og Volda på Hotel Alexandra i Loen torsdag, sa Lødemel dette i eit radiointervju med NRK Sogn og Fjordane:

– Eg føler ikkje at Sogn og Fjordane fylkeskommune har hjelpt oss så veldig. Sjølvsagt bidreg dei litt, men vi har utfordringar. Og det er bokstaveleg tala langt til Leikanger.

– Når vi då opplever at fylkespolitikarane frå Sunnfjord og ikkje ser verdien av å investere noko særleg i Nordfjord, og spesielt i Indre Nordfjord, så kan eg ikkje skjønne at det skal bli noko dårlegare i alle fall, sa Lødemel som samstundes var skuffa over at Hornindal og Stryn førebels er sett på vent av naboane i nord. Volda og Ørsta vil først forhandle seg i mellom, utan nordfjordingane.

Veg og skule

Fylkesordføraren i Sogn og Fjordane viser til fleire døme på at indre Nordfjord har fått sin del av fylkeskaka.

– Det aller siste er jo Olden–Innvik der vi no tek siste del og har investert for ein halv milliard kroner i den vegen. Flovegen står først på rassikringsprosjekt som skal startast, seier Følling.

Ho held fram:

– Vi har brukt mange millionar på oppussing av Stryn vidaregåande skule, og med E39 i indre og opprustinga av Utvikfjellet som er under planlegging–og andre ting–så er dette eit område som har blitt satsa på. Vi som fylkespolitikarar må faktisk sjå heile fylket, men vi synest også at dei indre delane av Nordfjord har komme godt ut.

Hornindal-ordføraren si liste

Men også Hornindal-ordføraren fører rekneskap. Stig Olav Lødemel svarer i ein e-post til NRK slik på fylkesordføraren si liste over velgjerningar:

Har Følling gløymt at:

• fylkespolitikarane nedprioriterte å ferdigstille Olden-Innvik i handlingsprogrammet 2006-2009, til fordel for Bremanger 2 og Dalsfjordsambandet.
• at dei så langt har utsett å bygge gangvegen på siste parsellen inn mot Olden.
• at dei nedprioriterte Fv. 60 Tomasgard-Møre grense, som no hadde tur etter Olden-Innvik, til fordel for m.a. fylkesordføraren sin eigen Fv. 57.
• at dei har stansa å gjere ferdig reguleringsplanen for Fv. 60 Tomasgard-Møre grense.

• 

  at fylkesordføraren ikkje vert opplevd som nokon pådrivar for rassikring av Rv. 15 og bru i indre, men set desse to prosjekta opp mot Hemsedalsfjellet og bru i midtre.
• at dei har lagt ned linja for teknikk og industriell produksjon ved Stryn vgs. og tømt lokala for utstyr.
• at E39 Kvivsvegen langt på veg vart køyrd fram av møringane.