Arbeidet med å tenkje nye og framtidsretta vegprosjekt er no i full gang over heile landet, og målet for alle aktørane er Nasjonal transportplan (NTP) for åra 2018 til 2027.
I Sogn og Fjordane vil det vere stort fokus særleg på E39, riksveg 5 gjennom Sogn og det som no er riksveg 52 over Hemsedalsfjellet. Sistnemnde er lansert som ein av to nye stamvegar mellom aust og vest.
Men draumen til mange er å få realisert bru heile tre stader langs og tvers over Sognefjorden.
1. Bruavløysing for ferjesambandet E39 Lavik–Oppedal:
Prislapp: Minst 7 milliardar
Statens vegvesen ønskjer å realisere verdas lengste fjordkryssing på 3,7 kilometer. Ingeniørar er alt i gang med å tenke nye tankar for korleis dette skal kunne gjennomførast reint praktisk. Dette vil vere den vanskelegaste og mest avanserte delen av ein ferjefri E39 frå Kristiansand til Trondheim.
2. Bruavløysing for ferjesambandet riksveg 5 Mannheller–Fodnes:
Prislapp: Ukjend
Førre veke presenterte Statens vegvesen ei framtidig løysing for Indre Sogn som kom overraskande på mange, ei lang bru til erstatning for ferja Mannheller–Fodnes. Prislappen er førebels ukjend, og saka skal gå mange rundar før prosjektet kan hamne i NTP. Brua blir då ein krumtapp i satsinga på aksen Møre–Austlandet via Hemsedal.
3. Bruavløysing for ferjesambandet fylkesveg 55 Dragsvik–Hella:
Prislapp: Minst 3 milliardar
Fylkesveg/riksveg 55 frå Vadheim til Skjolden har falle i bakevja dei siste tiåra, men har framleis ein viktig funksjon som tilførselsveg for trafikk både til E39 og riksveg 5 og E16. Draumen til politikarane i Midtre Sogn er at det skal kome ei bru til erstatning for ferjestrekninga Dragsvik–Hella.
– Først ønskjer vi å få plass føreseielege ferjeavgangar, og når vi vonleg får det på plass, så er det klart at vi dreg planane om ei bruløysing, seier ordførar i Balestrand, Harald Offerdal.