– Vi har berre to stader som har registrert tropenatt, seier statsmeteorolog Gitte Flesland ved Meteorologisk institutt.
Dei hadde på førehand sagt at i ytre strøk og langs fjordane kunne vente seg høge temperaturar, og dei fekk rett.
– Kråkenes fyr i Vågsøy registrerte 20,4 grader i natt. På Njøs i Leikanger vart det registrert 20,6 grader, fortel Flesland.
Dermed vart det ikkje like varmt som meteorologane hadde forventa.
– Nokre stader vil kanskje ikkje få lågare temperaturar enn eit par og tjue grader i løpet av natta, sa meteorolog Gunnar Livik ved Meteorologisk institutt til NRK i går.
Trengst vind
"Krava" til tropenatt er strenge – det kan ikkje vere under tjue grader frå klokka åtte om kvelden til klokka åtte om morgonen. Det krev spesielle vêrforhold.
– Det som ofte er gunstig for å få tropenatt, er at det er ein del vind. Det gjer at den varme lufta som ligg i høgare luftlag framleis blir blanda ned til bakkenivå. Overskya vêr utover natta fungerer dessutan litt som ei dyne, og minskar varmetapet frå bakkenivå, fortel Livik.
STRENGE KRAV: – Det kan ikkje vere under tjue grader frå klokka åtte om kvelden til klokka åtte om morgonen, fortel meteorolog Gunnar Livik.
Foto: Meteorologisk instituttNatt til laurdag vart venta ein del vind.
– Det bidreg til at nedkjølinga ikkje blir så stor i løpet av natta og tidlege morgontimar, seier meteorologen.
Ved kysten og fjorden
Livik seier tropenetter ikkje er heilt sjeldan her i fylket, det skjer nesten kvart år.
– Det er ofte stasjonar nær fjordar eller langs kysten som får det. Det er både fordi dei har litt meir vind og trekk, og fordi overflatevatnet har begynt å bli varma opp no på sommartid. Det kan ha svalande effekt på dagtid, men på natta vere med på å minske varmetapet frå bakkenivå.
Det er med andre ord folk langs kyst og fjordar som har er størst sjanse til å oppleve tropenatt i natt, mens gradestokken andre stader kan bikke under tjue grader.
– Det er nokre område, trass i at det er varmt, som ikkje får tropenatt, seier Livik.
