Sjølv om sola skin mange stader, står ikkje kvikksølvet veldig høgt på gradestokken.
Tysdag føremiddag er det faktisk varmare på Island enn mange stadar i Noreg. Noreg ligg i ei kaldbukt.
– Kalde luftmassar frå Arktis kjem nordfrå, og gjer at det blir kaldt sjølv om sola skin, seier meteorolog Julie Solsvik Vågane.
Samstundes blir Island og andre stadar i Europa treft av varmare luft som kjem sørfrå. Den gir også varmare vêr.
Tysdag kl. 11 blei det registrert ni grader i Reykjavík. Få stader i Noreg hadde høgare temperatur på same tid.
Ikkje uvanleg
At det er kaldt sjølv om sola skin og det nærmar seg mai, er ikkje uvanleg ifølge meteorologen.
– Det er ikkje uvanleg at april er ein månad med store kontrastar. Vi ser ofte både varme og låge temperaturar og det kan vere mykje nedbør og vind. I april kan vêret variere mykje frå dag til dag, seier Vågane.
Meteorologen er usikker på kor uvanleg det er at Island er varmare enn Noreg.
– Vi har ikkje like gode tal frå Island. Men at ulike stader får ulike luftstraumar er ikkje uvanleg. Det skjer heile tida.
Kan snu i helga
Sjølv om temperaturane ikkje minner om vår akkurat no, kan dette snu i helga, fortel Vågane.
– Dei neste dagane vil det framleis kome kald luft frå Arktis og temperaturane vil halde seg relativt låge, seier Vågane.
– Mot slutten av helga og over i neste veke ser det derimot ut til at det vil snu. Då vil vi heller få varmare luft sørfrå.
Lufta sørfrå er varmare og vil kunne gi høgare temperaturar i store deler av landet. Over i mai trur meteorologen det vil minne meir om vår.
– Då kan vi håpe på vårstemning og varmare vêr, seier Julie Solsvik Vågane.