NRK Meny
Normal

Deppar ikkje etter fjerdplass i Slovenia

Karoline Holsen Kyte føler på ingen måte at ho tapte medaljen i EM-motbakke. – Dei tre beste var i klasse for seg sjølve, seier 24-åringen.

Karoline Holsen Kyte og Eli Anne Dvergsdal

NØGD: For mange er 4. plass ei sur plassering, men Karoline Holsen Kyte (t.v.) føler ho vann, heller enn tapte den, i EM-debuten i motbakkeløp. Eli Anne Dvergsdal enda på 13. plass.

Foto: Privat

Førde-jenta sprang i mål kring halvanna minutt bak bronsemedaljevinnar Andrea Mayr (Austerrike).

Medan Karoline Holsen Kyte enda på 4.-plass, vart Eli Anne Dvergsdal frå Jølster nummer 13.

– Vi norske starta veldig langt bak, og dei tre som tok medaljeplassane sprengte starten. Eg merka dei hadde eit tempo som eg ikkje klarte å halde, seier Karoline Holsen Kyte.

Starta langt bak

Dermed konsentrerte Førde-jenta seg om å ta fjerdeplassen. Ei plassering som for mange ville vore sur å svelgje.

Utover løpet verka kampen å vere tøffare enn venta. Etter fire kilometer var Kyte i ein kvartett der det skilde berre seks sekund.

– Eg var nede på femte og sjette plass, men klarte faktisk å plukke dei to i ein nedoverbakke. Det vart tungt, men halvveges vart eg piggare og klarte å gi på litt ekstra i bakkane, seier Kyte som til slutt sprang i mål til tida 53 minuttar og 16 sekund.

– To gode løp

Eli Anne Dvergsdal

ARKIVFOTO: Eli Anne Dvergsdal har slite med skade og sjukdom i lengre tid. Ein 13. plass blant 64 deltakarar må difor vere godkjent.

Foto: Line Eilevstjønn Omland / NRK

Avstanden ned til landskvinna Dvergsdal var over to minuttar. Jølster-jenta tok sølv då ho EM-debuterte for to år sidan.

– Avstanden mellom oss var som den har vore tidlegare i år, så eg trur nok vi har gjort gode løp begge to, seier Kyte.

Dei tre som under banketten i kveld får medaljen om halsen, var det lite å gjere noko med.

– Dei beste er veldig, veldig gode. Av og til må ein berre akseptere at andre er betre, seier 24-åringen.

– Ikkje umogleg

Det er dermed ikkje sagt at det ikkje er råd å nærme seg tidsmessig, og kanskje ta steget opp på pallen ved neste høve.

– Ho som vann er ekstrem, men halvanna minutt er ikkje umogleg å springe inn. Eg har ikkje satsa så lenge og føler at eg har meir å gå på, seier Kyte.

Neste store mål er Skåla Opp i Loen, Førde opp og Stoltzen i Bergen. Noko NM får ho ikkje vere med på neste helg. I september ventar NM i halvmaraton.

– Rekordar er alltid kjekt, men rekordane på både Skåla og Stoltzen er veldig sterke. Men ein kan uansett få gode tider, seier ho.

Bønder føler seg ikkje trygge på vegen med traktor
Orkanen Tor var ikkje ekstrem nok
Ordninga bør endrast