– Skal næringslivet i Sogn og Fjordane stå fram konkurransekraftig må vi samhandla meir enn i dag og stå saman om fellesprosjekt. Vi har eit vidstrakt fylke der det ofte er mangel på kjennskap og kunnskap om kvarandre, seier Leon Bakkebø.
Som daglegleiar i Sogn og Fjordane næringsråd ser han det som si viktigaste oppgåve å tala næringslivet si røyst ut av fylket og nå fram til sentrale aktørar.
I fjor vinter tok Sparebanken Vest og Sparebanken Sogn og Fjordane initiativet til å danna eit næringsråd for Sogn og Fjordane, med mål om å «fremje næringsinteresser og bruke ressursane i fylket til å oppnå størst mogleg verdiskaping».
– Ikkje vore gode nok
Fredag var Bakkebø gjest i ettermiddagssendinga til NRK Sogn og Fjordane. Der snakka han om si nye stilling, og kva han tar med seg inn i rolla som dagleg leiar for næringsrådet.
– Vi har ikkje vore gode nok til å nå ut med kunnskapen og kvaliteten næringslivet her i fylket har. Der har fylka rundt oss vore flinkare til å stå samla og då får dei ting gjort, seier Bakkebø.
– Kva vert den største utfordringa?
– Det å få til det som er målet med selskapet. Å skapa entusiasme i næringslivet og skapa behov for oss. Vi har mindre regionale organ som gjer kjempejobb i dag, men ikkje eit samlande talerøyr ut av fylket, svarar han.
Bakkebø er utdanna siviløkonom og har lang erfaring frå stillingar i næringslivet, blant anna i Sogn og Fjordane Sparebank. I tillegg har han jobba i Hellas, Nederland og England.
– Det er eit stort uforløyst potensial i næringslivet som eg ønsker å vise fram til heile landet. I bransjar som havbruk, fiskeri, energi, landbruk og reiseliv er vi blant dei beste i landet og innanfor desse bransjane vil det bli mykje nyskaping i tida framover. Då må vi vera med, seier Bakkebø.