– Kjekt å bli nemnd saman med Hjelmeset

Begge har VM-gull i stafett for juniorar. Odd-Bjørn Hjelmeset i 1991 og Jon Rolf Skamo Hope i helga.

Sistnemnde i løypene der Hjelmeseth tok individuell OL-bronse i 2002.

– Odd-Bjørn har lukkast, så det hjelper jo godt på motivasjonen. Eg har eitt år att i juniorklassa og kan ta fleire VM-gull, seier 18-åringen frå Hyen.

– Ein for framtida

Gullet i helga er også Sogn og Fjordane sitt første i eit junior-VM, sidan Hjelmeseth sikra sitt i Reit Im Winkl for 26 år sidan.

Administrasjonssjef Yngve Thorsen er spent på kva framtida bringar for vårt fremste langrennstalent.

– Han er absolutt ein kar for framtida, men det er eit stort steg å gå opp i seniorklassen. Ein må vere tolmodig, det er berre eit fåtal som klarer å slå igjennom i ung senioralder, seier han.

Revansjesugen

Hope leverte ein god andreetappe i OL-løypene frå 2002. I motsetnad til 17.-plassen på fredagens duatlon, hadde glopparen gode ski og sende Harald Østberg Amundsen ut berre nokre få sekund bak Russland.

– Eg var revansjesugen og det gjorde godt å få ut litt aggresjon etter skuffelsen på fredag. Men det vart nervepirrande på slutten, seier Hope.

– Vi hadde ein utruleg god avsluttar i Thomas Helland Larsen på sisteetappe, og visste at sigeren var sikra om han var med mot slutten. Det var han, legg han til.

– Ei oppleving

Dermed kunne Hope, Herman Martens Meyer, Harald Østberg Amundsen og Thomas Helland Larsen stå øvst på pallen under medaljeseremonien måndag morgon norsk tid.

Med Russland og Frankrike på dei neste plassane.

– Det var ei oppleving å stå øvst med dei andre karane på laget, forsikrar han. Unødig å seie, det er god stemning i laget.

– Flyet til Seattle er kansellert, så det blir litt venting. Då er det ekstra morosamt med ein gullmedalje i bagasjen, humrar Hope som no håpar å sikre samanlagdsigeren i Norgescupen.