– Det er berre småmasse, tre og jord som har kome ut på vegbana. Utan sperringane hadde det vore noko heilt anna. Dei har rett og slett gjort jobben dei skal gjere, fortel Skule Jacobsen frå Statens vegvesen.
Les også: Ras stenger E39
Han er på rasstaden ved Dregebøvatnet som kontrollingeniør, saman med to geologar. Dei har vore der sidan klokka 8 i dag tidleg, og planen var å gjere ei vurdering av kor tid vegen kan opnast.
Kom seg ikkje i lufta
– Vi har eigentleg ikkje fått gjort så mykje, for det ligg tett skodde her i området, så vi kjem ikkje til med helikopter endå, sa Jacobsen i morgontimane. Det var tjukt med skodde ved Dregebøvatnet, men i titida kom Vegvesenet seg i lufta med helikopter.
Det lysnar til og går mot ein solrik haustdag i Sunnfjord, men akkurat i rasområdet var det så dårleg sikt at dei ikkje ein gong kunne sjå heile raset frå vegen der dei står.
– Vi veit ikkje eingong kva vi må gjere endå. Det kan hende vi må spyle ut masse, eller at er fare for fleire ras. Det er dette vi må vurdere frå helikopter når vi har fått betre oversikt over raset og området, seier Jens Tveit som er geolog i Vegvesenet.
Det kan altså virke som om hovudvegen langs kysten av Vestlandet kjem til å vere stengd dei neste timane, og då er det omkøyring via Leirvik i Hyllestad og Dale i Fjaler som gjeld.
Gjekk ras også i januar
Det er den splitter nye delen av E39 rundt Sande som har vorte råka av raset, og det er ikkje første gong. Under byggingsarbeidet i januar gjekk det og eit ras i same området, og då vart ein lastebil knust av steinmassane.
Les også: Lastebil knust i raset
– Eg trur det er tilfeldig at det har gått to ras her i området med så kort mellomrom. Det har kome store nedbørsmengder den siste tida, og eg vil tru at det er det som har utløyst dette raset, seier geolog Jens Tveit.