1900 fleire flaug her i mai

– Vi er svært godt nøgde. Vi har hatt ein god auke både på flypassasjerar, men også på helikopterpassasjerar i mai månad, seier flyplassjef ved Florø lufthamn, Siv Merete Stadheim.

– Vi ser at når offshorepassasjerane aukar, så påverkar det også flypassasjerane våre. Men det blir litt synsing. Vi har ikkje nøyaktig statistikk på kven som flyg meir eller mindre, seier Stadheim.

• LES OGSÅ: Streik lammar Nordsjø-trafikken
• LES OGSÅ: Frp-politikar meiner Widerøe har lurt til seg Florø-rutene

Næringslivet påverkar

Ho har likevel notert seg at det har vore ein auke i mannskapsskifte i Florø.

– I tillegg er påverkar alltid aktiviteten i næringslivet i regionen flytala for Florø lufthamn, seier Stadheim.

Ho held fram at dei også har hatt ein god regularitet, noko som også kan vere med på å forklare tala.

Men også tala for dei fem første månadene syner at flytrafikken til og frå Florø lufthamn har stige jamnt.

(Artikkelen held fram under TV-innslaget)

Nær 9500 fleire enn i fjor

I løpet av dei fem første månadene i 2012 har 76.165 personar reist via Florø. Same tal for i fjor var 66.727. Det betyr at 9438 fleire reiste via flyplassen i år i høve i fjor.

– Totalt har vi ein auke på om lag 14 prosent, og det er vi godt nøgde med. I denne perioden har vi skifta frå DAT til Widerøe. Det er sjølvsagt gledeleg å sjå at dei held fram den gode trafikkutviklinga som DAT hadde i si periode, seier Stadheim.

Widerøe tok nemleg over for DAT med flygingar til og frå Florø.

– Årsaka er nok også at kundane er nøgde med rutetilbodet som flyselskapa tilbyr. I tillegg har aktivitet i området vårt ein god del å seie, både på utgåande og innkommande passasjerar, trur Stadheim.

• LES OGSÅ: Har reist tusenvis av mil åleine mellom pappa og mamma
• LES OGSÅ: Vekst på alle flyplassane

Kan bli travelt framover

Ifølgje firdaposten.no kan det bli 30 avgangar og landingar torsdag dersom streiken held fram.

– Dei siste signala eg har fått, er at vi må førebu oss på å ta imot trafikken frå Førde lufthamn Bringeland i morgon, i tillegg til vår eigen. Eg reknar med at dette skal gå breitt, seier Stadheim til avisa.

Dersom streiken framleis står på torsdag kjem ein til å frakte Bringeland-passasjerar til Florø med buss, der Widerøe vil bly dei til Bergen og Oslo. Motsett veg vil Bringeland-flya lande i Florø, og passasjerane vil bli transporterte austover med buss.