Ođđa sámediggeráđđi Suodjalusa birra: – Ferte beassat hárjehallat

Máilbmi manná dan guvlui, ahte mii beare sáhttá geavvat. Danne lea Ráđđehus mearridan buoridit gearggusvuođa ja investeret Suodjalussii.

Sámediggi maid oaidná ahte fertejit eambbo čuovvut suodjaluspolitihka.

Duorastaga ásahedje sii ođđa áššesuorggi: Suodjalus- ja sihkkarvuođapolitihkka.

Dat šaddá vuosttaš geardde áššesuorgin Sámedikkis ja sámediggeráđđi Paul Bendikk Jåma dat galgá jođihit dan ođđa áššesuorggi.

Jåma: Ferte leat buorre gulahallan

Ulbmilin lea buoridit gulahallama Suodjalusa ja Sámedikki gaskkas.

Sámediggi galgá buktit cealkámušaid ovdamearkka dihtii go lea sáhka das, makkár guovlluin Suodjalus hárjehallá. Ja seammás bearráigeahččat sámi ealáhusaid ja beroštumiid.

– Doaimmat mat gusket suodjalussii, leat dieđusge relevánttat maiddái sápmelaččaide.

Paul Bendikk Jåma lohká, ahte lea lunddolaš addit maiddái Sámediggái sátnesadji, go sáhkan lea Norgga suodjalus- ja sihkkarvuođapolitihkka.

Ja lea maiddái lunddolaš, ahte Suodjalus dárbbaša eanet saji hárjehallat. Dainna son jáhkká Sámedikkis lea dehálaš rolla gulahallamis.

– Mii vástidit buriin mielain dasa, ahte Suodjalus lasiha sin doaimma. Muhto dat ferte čovdojuvvot ovttas singuin, geain leat vuoigatvuođat guovlluide gos Suodjalusa doaibmá lassána, muittuha Jåma.

Suodjalus háliida vuhtiiváldit sámiid

– Suodjalus atná árvvus go gulahallan suodjalus- ja sihkkarvuođapolitihkka gažaldagain davviguovlluin buoriduvvo.

Nu vástida Suodjalusa preassavákta Aleksander Engborg Hage e-poasttas.

Son dadjá ahte Suodjalus galgá ollašuhttit iežas servodatulbmila lágaid ja rivttiid čuovodettiin,

– Mii deattuhit ahte galgá leat buorre dialoga sámi kultuvrra, boazodoalu ja báikkálaš beroštumiid vuhtiiváldima birra doppe gos mis leat min doaimmat, dadjá Hage.

Okta ášši ii sáhte njeaidit nuppi

Sámedikki stuorámus opposišuvdnabellodat, Nordkalottfolket, oaivvilda ahte boazoealáhus ii galgga eastadit Suodjalusa hárjehallamis.

– Mii fertet vuhtiiváldit sámi vuoigatvuođaid nu bures go vejolaš, muhto Suodjalus ferte beassat hárjehallat dáin guovlluin, lohká Knut Hærulf Wingstad Nordkalottfolketis.

Wingstad deattuha, ahte mis ferte leat buorre sihkkarvuođapolitihkka davvin.

– Boazodoallu ii sáhte leat juohke sajis. Mii fertet nagodit atnit guokte jurdaga oktanaga ja vuhtiiváldit boazodoalu buoremus lági mielde. Muhto mas nu ferte luohpat. Sis eai sáhte leat buot vuoigatvuođat olles áigge, oaivvilda Knut Hærulf Wingstad.

Majestehtalaš doarjja

Maiddái Norgga Majestehta Gonagas Harald V, deattuhii sihke Suodjalusa dehálašvuođa ja sámi kultuvrra vuhtiiváldima Sámedikki 10. rahpan sártnis.

– Jagi 2025 mii eallit ođđa eahpesihkkaris riikkaidgaskasaš áiggis. Mis lea fas soahti Eurohpás. Mii leat duođaleamos sihkarpolitihkalaš dilis nuppi máilmmisoađi rájes.

– Danne fertet boahtte jagiid investeret eanet Suodjalussii. Seammás ferte Suodjalus váldit vuhtii sámi kultuvrra ja árbevirolaš sámi ealáhusaid.

Paul Bendikk Jåma lea duđavaš, go gonagas doarju sápmelaččaid.

– Gonagas lea maiddái sápmelaččaid gonagas, na mun anán su sárdni hui árvvus, lohká son.