– Dát lea lobiheapme go boazodoallolágas čuožžu čielgasit ahte johtingeainnu johtolat galgá bissut rabasin johttisiidii, muhto go johtolat lea giddanan bieggafápmorusttega- prošeavtta geaidnohuksemiid geažil, de ii beasa eallu dan meattá, čilge advokáhtta Gudesen.
Jillen-Njaarke orohaga advokáhtta ballá Øyfjella johtolaga Vefsn suohkanis Nordlánddas bissut gitta boahtte áigái maid, jus huksejeaddjit besset cegget bieggaturbiinnaid nugo leat plánen.
Dát lea su mielas duođalaš ášši.
Huksenbarggut leat stuorra hástalussan
Jillen-Njaarke orohaga boazosápmelaš Ole Henrik Kappfjell lea heađástuvvan go čora mas lea guoktelogi heagga lea báhcán várrái geaidnohuksemiid duohkái.
Ja son ii dieđe vuos mo son galgá daid oažžut doppe vulos.
OHCALA BARGORÁFI: Ole-Henrik Kappfjell ohcala bargoráfi go bargá bohccuiguin.
Foto: Dan Jåma– Midjiide lea stuorra hástalussan dat go johtolat lea gitta ja min miesseálddut eai beasa meattá huksenbáikki, čilge Kappfjell.
Ruoŧa Eolus Vind AB nammasaš bieggafápmorusttet-fitnodat lea ožžon lobi Norgga eiseválddiin hukset 72 bieggaturbiinna gasku Jillen-Njaarke johtingeainnu.
Orohahkii lea johtingeaidnu áibbas dárbbašlaš, go orohaga eallu lea ruvgalan seammá duvdagiid juohke jagi áiggiid čađa.
Nugo dál lea dilli Øyfjellas, de eai oainne orohatolbmot ahte sihke boazoealáhus ja bieggafápmoealáhus birgejit guovllus bálddalaga.
Lohká saji goappaš ealáhusaide
Oljo- ja energiijadepartemeantta stáhtačálli Tony Christan Tiller (Olgeš) lea digaštallan dán ášši medias.
Sus lea jáhku čovdosii mii lea buorrin guktui beliide. Ii ge mieđa prošeavtta lobiheapmin.
– Mii eat leat goassige mearridan johtolaga giddet, go boazodoallolágas boahtá ovdan ahte gidden lea lobiheapme, dadjá son.
II LOBIHEAPME: Stáhtačálli Tony Christian Tiller ii oainne makkár ge boasttuvuođaid huksenbargguid oktavuođas.
Foto: HøyreMuhto doppe han leat ain bohccot mat eai beasa meattá huksejeaddjiid?
– Dat lea oainnat nu ahte eanaš bohccot leat beassan meattá. Huksejeaddji galgá bissehit bargamis jus muosehuhttet johtima, dadjá Tiller.
Son vuohttá maid heajos gulahallama ja unnán buorredáhtolašvuođa bealálaččaid gaskka, ja oaivvilda saji guktuid beliide boahtteáiggis.
GEINNODAT: Dákko dat johtet Jillen-Njaarke bohccot geasseorohahkii.
Foto: Eolus Vind ASBallá boahtteáiggis
Ole Henrik Kappfjell lea ain eahpesihkar mo sii galget olles ealuin beassat geasseorohahkii.
Muhto dat mii vuorjá su eanemusat lea boahtteáigi, go su áddejumi mielde ii leat sadji sihke ellui ja bieggaturbiinnaide.
– Mu mielas lea dál juo hástalussan dálá dilálašvuohta, ja mun in ipmir mo sii sáhttet čuoččuhit ahte guovllus sáhttet goappaš ealáhusat birget. Dat lea veadjemeahttun, dadjá Kappfjell.
