Bákčasiid čađa šaddá dikšut isidis: – Muhtomin in goastta gosage bákčasiid dihte

Fylkkamánni áigu guorahallat Kárášjoga dearvvašvuođafálaldagaid.

Ole og Biret Ánne Tretteskog

DIKŠU: Ole ja Biret Ánne Tretteskog dárbbašivččiiga goappašagat divššu.

Foto: Marit Sofie Holmestrand / NRK SÁPMI

Biret Ánne Tretteskog (89) ferte juohke beaivvi ieš dikšut isidis ruovttus, go son lea muittohuvvan. Son muitala ahte dárbbašivččii ieš maid divššu buozalmasvuođa dihtii. Dan veahki son ii oaččo.

– Mus leat muhtomin nu bákčasat juolggit, ahte in goastta in gosage. Iđđes ferten bágget iežan lihkkat, muitala Biret Ánne.

Kárášjohkalaš ii loga gal losses bargun dikšut isidis, muhto sus lea máŋgii váivi.

– Dat lea lossat oaidnit iežan isida nohkamin. Dakkár dearvvas olmmoš mii son lei, muitala son lossadit.

Tretteskog muitala ahte ruovttubuohccedivššárat fitnet gal sudno luhtte, muhto eai leat doppe guhkit go vihtta minuhta.

– Lea gal buorre go fitnet ja oidnet lea go šat heagga. Muhto sis ii leat dilli čohkkedit ja jearrat mo dilli lea. Sii lohket sis lea hoahppu ja eai astta, ja nu sii mannet.

Isit Ole Tretteskog (91) lei vahkkui ožžon oanehisáigge dikšosaji dearvvašvuođaguovddážis, muhto bođii ganjalčalmmiid fas ruoktot ja sávai ahte eai šat bija su dohko.

– Heahtedilli

Máret Guttorm Graven lea oapmahaččaid sátnedoalvu.

Marit guttorm graven

OAPMAHAŠ: Marit Guttorm Graven.

Foto: Marit Sofie Holmestrand / NRK SÁPMI

– Dát lea duođalaš ášši ja dál lea duođaid heahtedilli.

Graven muitala ahte buohcciidruovttus váilot bargit. Ja boarrásat ja buohccit, geat leat doppe, eai oaččo doarvái buori divššu.

– Mii diehtit gielddas leat guoros lanjat ja seaŋggat, muhto gielda ii leat vuoruhan ruđa bidjat eanet bargiide.

– Buohkat eai beasa earánastit go leat unnán bargit. Muhtumat eai sáhte ieža boradit. Borramuš bukto njuni vuollái, muhto eai leat bargit geat borahit.

– Stuorra buozalmasvuohta

Kárášjoga sátnejođiheaddji Svein Atle Somby mielas ii leat dákkár dilli dohkálaš.

Ordfører i Karasjok

SÁTNEJOĐIHEADDJI: Svein Atle Somby.

Foto: Marit Sofie Holmestrand / NRK SÁPMI

– Mun in leat gal gullan ahte doppe šaddet baikit buvssaid, muhto jus nie leaš dilli, de ferte dahkkot juoidá doppe dálánaga. Mii fertet olbmuid oažžut dohko. Mu mielas ii oro gal dákkár dilli dohkálaš, ii veaháge.

Sátnejođiheaddji dadjá ahte lea váttis dadjat gokko sivva sáhttá leat.

– Dat leat sihkkarit máŋga ášši, mat dahket dan. Muhto mis lea leamašan váttisvuohta oažžut jođiheaddji dohko. Ja mis lea stuorra buozalmasvuohta.

Son muitala go leat unnán bargit, de šaddá stuorát bargonoađđi earáide go eai leat doarvái bargit, ja nu datge buohccájit.

– Dál bargojuvvo hui garrasit gieldda beales ahte oažžut olbmuid bargui. Doppe leat virggit doarvái, muhto eat oaččo olbmuid virggiide.

– Boahtán váidalusat

Dearvvašvuođa ja sosiála veahkkedirektevra Snorre Manskow Sollid muitala ahte Tromssa ja Finnmárkku fylkkamánnii leat boahtán váidalusat.

Snorre Manskow Sollid

Snorre Manskow Sollid, dearvvašvuođa- ja sosiála veahkkedirektevra.

Foto: Sindre Reinholt

– Mii leat dál árvvoštallamin dáid váidalusaid ja dieđuid oktasaččat vai lea vuođđu oaidnit makkár doaimmaid Fylkkamánne bealis sáhttit álggahit.

Kárášjoga gielda lea dál mearridan juolludit miljovnna kruvnnu gieldda dearvvašvuođa suorgái, muitala várresátnejođiheaddji John Nystad.

  • Loga eambbo Fylkkamánne árvvoštalai 2015:is Kárášjoga gieldda stivren gelbbolašvuođa
  • Les en kort sammendrag på norsk