Čájehedje vuostemiela ruvke vuostá Londonis – gáibidit ahte fitnodat geassáda
Gávccis čájehedje vuostemiela Hartree Partners vuostá Londonis maŋŋebárgga.
Fitnodat lea investeren birrasii 140 miljovnna dollára Nussir ruvkeprošektii Riehpovuonas.
Miellačájeheddjiid gaskkas ledje earret eará artista Ella Marie Hætta Isaksen, Riddu Riđđu festiválahoavda Sajje Solbakk ja dramaturga Siri Broch Johansen.
– Lea lunddolaš midjiide čájehit vuostehágu go dakkár fitnodagat suoládit sámi eatnamiid. Eatnamiid haga min kultuvra ii šat eale, dadjá Ella Marie Hætta Isaksen.
Isaksen muitala ahte son beasai dearvvahit Hartree Partners sihkkarvuođahoavdda, muhto miellačájeheddjiid eai luoitán sisa vistái.
– Mu mielas lea heajos láhttenvuohki ahte investerejit olu ruđaid ruvkeprošeavttaide sámis, muhto eai gierdda deaivat sápmelaččaid, dadjá son.
NRK lea bivdán kommentára Hartree Partners fitnodagas Londonis, muhto ii leat vuos ožžon kommentára.
