Ráđđehus duppalastá doarjaga sámi valáštallamii
Kultur- ja dásseárvoministtar Anette Trettebergstuen lohká ráđđehusa dál jahkásaččat juolludit 3 miljovnna kruvnna sámi valáštallamii, beannot miljovnna kruvnna eambbo go dálá juolludeapmi.
– Ruhta galgá sihkkarastit sámi mánáid ja nuoraid vejolašvuođa searvat valáštallamii, lohká Trettebergstuen.
Sámi Valáštallan Lihttus (SVL) leat ballagoahtán organisašuvnna boahtteáiggis go lea eahpesihkkaris ruhtadeapmi organisašuvdnii.
– Ruhtavátnivuohta lei čuohcat min oasálastima Árktalaš dálveriemuide (AWG) ja maid Norggameašttir heargevuodjimiidda Romssas.
Nu logai Sámi Valáštallan Lihttu stivrrajođiheaddji Per John Anti mannan čavčča. Dál illuda Anti go gullá man olu lassána ruhtadoarjja sámi valáštallamii.
Sámedikki bokte dat manná ruhtadeapmi ráđđehusas sámi valáštallamii. Sámediggeráđđi Maja Kristine Jåma illuda dieinna ruhtadoarjagiin.
– Mii leat olu gulahallan Sámi Valáštallan Lihttun ja vuolláičállán áigumuša sámi valáštallama hárrái, dát stuorra ruhtalassáneapmi lea buorre vuođđun sámi valáštallama boahtteáigái, lohká Jåma. Dát ruhta sámi valáštallamii boahtá tippenruđaid bokte, mas stáhta lea dinen badjelaš 3,2 miljárdda kruvnna mannan jagi.
