Det gamle damplokomotivet «Hugin», eller «Eiegubben» som det vart kalla, har sidan 1976 stått utstilt i avgangshallen på togstasjonen i Stavanger. No skal det ut fordi togstasjonen skal renoverast, og då er det ikkje lenger plass til den gamle slitaren.
Det er Dalane Tidende som skriv om dette i dag.
Det er Norsk Jernbanemuseum på Hamar som eig lokomotivet, og det er truleg dit ferda går for «Hugin». Men lokførar Ståle Helleren frå Egersund, som jobbar i NSB, håpar lokale krefter i heimkommunen kan henta lokomotivet «heim».
For mellom 1944 og 1952 gjekk lokomotivet i rute mellom Egersund sentrum og jarnbanestasjonen på Eie.
– Det hadde vore veldig kjekt om dette flotte lokomotivet kunne blitt stilt ut her i byen, seier Helleren til avisa.
Iver Mathiesen, eigedomssjef i Rom Eiendom AS, som er eit dotterselskap av NSB, er positiv til at det kan flyttast til Egersund dersom sjansen skulle by seg.
– Me kjem til å stilla oss positive til gode planar i Egersund.
Krev at det skal stå sikkert
Men om det skal bli flytting må det koma gode planar for oppbevaring og vedlikehald, er den klare beskjeden frå Norsk Jernbanemuseum.
– Me er opptekne av at det skal bevarast best mogleg, så det skal leggjast fram eit veldig godt prosjekt om nokon andre skal få det, seier Roar Stenersen, overingeniør i Jernbaneverket og teknisk leiar ved Norsk Jernbanemuseum på Hamar.
– Det er eit absolutt krav at det skal stå sikkert slik det har stått dei siste 40 åra, seier Stenersen til NRK.
Han har ikkje høyrt om interessa frå Egersund denne gongen, men det er ikkje første gongen det har vore snakk om å flytta lokomotivet. Ålgårdbanens vener var på sporet for ei stund sidan, men fekk ikkje tak i eit skikkeleg utstillingslokale.
– Kvar gong det er snakk om at det skal flyttast, så kjem lokale aktørar på bana. Eg ventar også på ein telefon frå Bergen om å få det dit, sidan det gjekk i det området før det var i Stavanger-regionen, seier Stenersen.
Eit nasjonalt klenodium
Stenersen har meir peiling på tog enn dei fleste, og seier «Hugin» er eit nasjonalt klenodium.
– Det vart bygd i 1883 og gjekk på Vossabana før det kom til Stavanger-distriktet i 1904. Det er det mest standardiserte lokomotivet me har hatt i landet, og «Hugin» er eit av 35 lokomotiv av den typen. Det er eit seigliva lokomotiv, og gjekk på alle baner i landet. No er det berre «Hugin» som er att, seier han.
På Hamar har dei utstillingsplassen klar.
– Me kan setja det rett inn i hovudutstillinga utan å gjera dei heilt store endringane, seier Stenersen.