– Dette er ei annleis utstilling av menneske som vanlegvis ikkje blir framstilt i bronse og som vanlegvis ikkje blir heidra, seier Per Inge Torkelsen.
Skulpturserien «De hjemløse» oppdaga Torkelsen og kona Anne Mette Hestad i byen Viborg i Danmark.
Stavangerprofilen kontakta like godt kunstnaren, og nå har dei altså hamna rundt om i Stavanger sentrum. Der skal dei stå til rett over nyttår.
Gåve til Frelsesarmeen
Per Inge Torkelsen.
Foto: Mia Langås FlåtaKunstprosjektet er finansiert av Torkelsen sjølv, saman med Åge Westbø og Silje Netland. Dei gir utstillinga i gåve til Frelsesarmeen.
– I Stavanger har me nok av skulpturar av kaksar, skipsreiarar og forfattarar frå overklassen med flotte frakkar. Dette er ei utstilling som skal fokusera på dei som slit. Dei er det dessverre altfor mange av.
Å gjera ein forskjell
Det var varaordførar Bjørg Tysdal Moe (KrF) som opna utstillinga på Domkyrkjeplassen laurdag. Ho snakka i talen sin om korleis folk kan gjera ein forskjell i byen sin i det daglege.
– Det er kvalitet i kvar og ein skulptur og eg utfordrar oss alle til å ha ein refleksjon når me ser desse; kva kan den enkelte bidra med. Ingen kan gjera alt, men alle kan gjera litt, var bodskapen frå varaordføraren i Stavanger.
