Vil bli blant dei største i landet på terrengsykling – like ved Preikestolen

– Det er fantastisk. Endeleg er det nokon som torer å satsa, seier Gunn-Rita Dahle Flesjå.

Tidenes mestvinnande terrengsyklist har gitt seg som profesjonell utøvar, men deler gjerne tips og triks med sykkelentusiastane i nye Dalen stisenter på Jørpeland i Ryfylke.

Regionen som er mest kjent for turistmagneten Preikestolen, har opna ein 1,5 kilometer lang sykkelsti som innbyr til luftige svev og krappe svingar i høg fart.

Men dette er berre første tråkk i jobben med å komma heilt i tet på det norske sykkelkartet.

– Me har Preikestolen, vakker natur, sjø og fjordar. Me kan bli kjempestore og har mykje å gle oss til, meiner den tidlegare sykkelproffen.

Sykkelløype langs Lysefjorden

Den langsiktige planen til Ryfylke sykkelklubb er å bygga 50-60 kilometer med sykkelløyper i Ryfylke til ein prislapp på opp mot 100 millionar kroner.

– Dette blir eit fantastisk tilbod både for å auka bulysta, folkehelsa og turistnæringa, seier prosjektleiar i Ryfylke sykkelklubb, Aleksander Amdal.

I sykkelplanen blir det peika på ni område å bygga ut sykkelløyper på. Blant desse er Preikestolen stisenter ved preikestolhytta. I tillegg er målet å få til ei sykkelløype langs Lysefjorden inn mot Lysebotn.

– Du vil følgja fjellryggen langs fjorden. Det vil bli ein episk sti som vil setja Lysefjorden og Ryfylke på det internasjonale sykkelkartet, meiner Amdal.

– Det trengst nye anlegg

Men det er kamp om plassen på sykkelkartet.

Over heile landet blir det i desse dagar investert fleire hundre millionar kroner i sykkelstiar og sykkelanlegg, ifølge Opplysningskontoret for terrengsykling.

– Koronapandemien har forsterka interessa. Fleire ønsker å vera aktive i naturen og mange vil ha andre opplevingar enn til fots, seier styreleiar Lars Wraae Jensen.

Trysil har stått i spissen for utviklinga av tilrettelagde sykkelstiar her til lands og fleire andre plassar har følgd etter i sykkelspora.

Det er likevel ikkje fare for at storsatsingar som i Ryfylke tar lufta ut av andre sykkeldestinasjonar, ifølge Wraae Jensen.

– Det trengst nye anlegg og Noreg er framleis i ein tidleg sykkelfase. Andre plassar i Europa som Skottland har drive på med dette i fleire tiår. Der har sykkel blitt ein del av det nasjonale reiselivsproduktet.

60 prosent vekst

Interessa for sykling utanfor asfalterte vegar viser også igjen i salstala til sportsbutikkane. Sportskjeda XXL opplevde ein vekst på drygt 60 prosent i talet på terrengsyklar i fjor.

– Me har sett ei aukande interesse for sports- og friluftsutstyr både på sommaren og vinteren. Mange av dei som går på topptur om vinteren, har også kjøpt seg ein terrengsykkel for å kunne ferdast i fjellet på sommaren, seier salssjef for sykkel hos XXL, Andreas Schjem.

Men toppen i salet av terrengsyklar blei nådd i 2012-2013. Etter det har dei nasjonale salstala gått ned og lege stabilt på 70.000 terrengsyklar i året.

– Likevel veit me at underkategoriar innan terrengsykkelsegmentet er i endring, der også elsyklar veks, seier administrerande direktør i Norsk Sportsbransjeforening, Trond Evald Hansen.

Det er ein lang etappe som står att før alle sykkelplanane i Ryfylke er i sving. Men spelemidlar, ein god porsjon dugnad og ein kommune som heiar på planane har gitt ein god start.

– Dette trur me er starten på noko kjempestort. Me ser korleis dette tar av både i Noreg og andre land, seier ordførar i Strand, Irene Heng Lauvsnes (H).

– Me treng nokre år på å bli større enn Trysil. Men me kan utan tvil få til noko likande her, meiner Gunn-Rita Dahle Flesjå.