Sundag skjedde det igjen. Svære steinblokker raste ned i vegbanen i Rødsliane i Suldal. Mange av blokkene er store nok til å knusa ein bil og ta menneskeliv.
Vegstrekket der raset gjekk blei i 2018 kåra til Noregs tredje verste veg av ein fagjury og NRK sitt publikum. Sidan den gong har det gått mange nye ras, men ingen rassikringstiltak er sett i verk på strekket.
Nå vurderer likevel Vegvesenet om det er mogleg å setja inn strakstiltak, som eit fanggjerde.
Men den jobben kan bli for farleg.
– Det ligg stein i skredbanen
Geologar har nemleg undersøkt rasområdet med drone. Sjølv om vegen har opna, så gir dronebilda grunn til bekymring.
– Det ligg framleis mykje laus stein i skredbanen. I tillegg er det fleire aktive løyseområde i fjellsida, seier geolog Simon Løvås frå Vegvesenet.
Paradoksalt nok kan det bety at å setja opp eit fanggjerde vil bli ein for risikabel jobb. Risikovurderinga går då på kor trygt det er å ha folk på arbeid over lengre tid i det rasfarlege området.
Geologen understrekar at det ikkje er bestemt kva som vil skje vidare, men slår fast at det utan skredsikring vil koma meir stein ned.
– Eg håpar at det kjem pengar slik at det kan setjast i verk omfattande skredsikring. Folk som bur her fortener ein tryggare veg, seier han.
Berre nokre timar etter intervjuet melde lokalavisa Suldalsposten at det hadde kome meir stein ned i vegbanen.
Ein gjennomgang av NRK sitt eige bildearkiv på nett viser at livsfarlege ras er ein del av kvardagen på Riksveg 13 i Suldal kommune.
Håper på prioritering i NTP
I desse dagar reiser samferdselsminister Knut Arild Hareide rundt i landet for å få innspel til ny Nasjonal transportplan (NTB). Torsdag skal han til Stavanger for å diskutera prioriteringane som er spelt inn frå Rogaland.
Frå før ligg Riksveg 13 Lovraeidet – Rødsliane inne i siste del av transportplanen. Det betyr rassikring og fire kilometer tunnel tidlegast i 2024.
Stortingspolitikar frå Senterpartiet, Geir Pollestad, meiner dei siste rasa viser at dette må skje tidlegare.
– Det hastar med å få gjort desse utbetringane. I alt for mange år har det ikkje skjedd noko på riksveg 13. Eg håper det kan skje noko allereie før NTP skal behandlast i vår, seier Geir Pollestad.
Men dersom det ikkje blir omprioriteringar dette året, meiner Pollestad at det i alle fall bør ligga inne pengar til rassikring i den første fireårsperioden, som startar i 2022.
Hareide har ennå ikkje svart på førespurnaden frå NRK Rogaland.
Skuleveg
Partifelle og Suldal-ordførar Gerd Helen Bø (Sp), er samd. Å kjempa for pengar til rassikring er ein stor del av kvardagen hennar.
– Det er i grunnen ras som står i hovudet mitt heile vegen. Slik er det å vera ordførar i Suldal, seier Bø.
Og samstundes som rasa kjem jamleg, auka også trafikken då Ryfast-tunnelen opna i slutten av 2019. Dei to første månadane i år var det 16 prosent fleire bilar som passerte Vegvesenet sitt teljepunkt på Lovra, samanlikna med i fjor.
At vegen også er skuleveg for ungdomsskuleelevar, som køyrer buss her to gonger dagleg er noko innbyggjar i kommunen, Åshild Vetrhus, er bekymra for.
– Eigentleg prøver me som bur her å ikkje tenkja på det, men det blir jo litt vanskeleg når du ser lause steinblokker henga over vegen, seier ho.