NRK Meny
Normal

– Rotete saksgang

På grunn av feil i saksgangen har ein av dei som er sikta i mishandlingssaka i Stavanger fått oppheva fengslinga. Feilen var at forsvararen til mannen, Atle Helljesen, ikkje fekk innsyn i dokumenta.

Atle Heljesen

Forsvararen til den sikta 26 åringen, Atle Helljesen, kallar saksgangen i mishandlingssaka rotete.

Foto: Hansen, Alf Ove / SCANPIX

Helljesen, kallar det heile for rotete og som forventa.

Han fekk ikkje innsyn i dokumenta i saka, og anka derfor avgjersla om å fengsla klienten hans, anken blei høyrt i Gulating lagmannsrett i dag.

Sjølv om ein av dei sikta i mishandlingssaka i Stavanger har fått oppheva fengslinga, blir han lite truleg sleppt laus etter det NRK erfarer. I morgon er det nytt fengslingsmøte.

– Eg har eit absolutt krav på innsyn, og det fekk eg ikkje, derfor var dette som forventa, seier Helljesen til Nrk.no.

Nytt fengslingsmøte

Nå har Helljesen fått innsyn i dokumenta kan politiadvokat Karsten Monsen fortelja, og han har signert på at han har teieplikt i forhold til desse.

I morgon vil det bli nytt møte om fengsling i Stavanger tingrett for ein av dei sikta i mishandlingssaka.

– Me meiner sjølvsagt at det er grunnlag for at han framleis skal vera fengsla, avgjersla til lagmannsretten er berre basert på at det var ein feil i saksgangen, seier politiadvokat Monsen til Nrk.no.

Karsten Monsen

Politiadvokat Karsten Monsen er klar for nytt fengslingsmøte i morgon.

Foto: Hansen, Alf Ove / SCANPIX

Mishandla over fleire dagar

Det var fredag 13. august at Jonny Andrè Risvik (28) blei funnen død i ein bustad på Kampen i Stavanger. Han hadde blitt mishandla dagar i forkant.

Ein av dei som blei sikta og fengsla var ein 26 år gamal mann, han fekk torsdag oppheva fengslinga på grunn av feil i saksgangen.

Grafikk, dødsfall Stavanger

Dette er ein oversikt over dei sikta i mishandlingsaka i Stavanger. Det er 26 åringen som har fått fengslinga oppheva.