Nei til høgare bustadblokker

Dei leiande politikarane i Stavanger har vedtatt at det skal byggjast tettare og høgare i byen for å få plass til fleire leilegheiter.

Tysdag kveld gjorde eit samrøystes bydelsutval i Storhaug bydel sitt beste for å bremsa dei planane. Utvalet sa nei til den nye planen om å byggje 8 etasjars bustadblokker langs sjøen i Lervig, i staden for fem etasjar høge blokker, slik den opphavlege reguleringsplanen la opp til.

– Åtte etasjar høge blokker blir for forrykande tett ned mot det som skal bli ei lita bukt i området. Det seier utvalsleiar Geir Ronaldsen frå partiet Høgre.

• LES OGSÅ: Rogaland mangler 19.000 boliger
• LES OGSÅ: – Endelig flater boligprisene ut

Må ha skikkeleg vegløysing

Politikarane i utvalet var også overraska over at dei nye utbyggingsplanane med høgare bustadblokker, kunne godkjennast på sommarfullmakt frå administrasjonen i Stavanger.

– Spesielt når det vert lagt opp til 150 % utnytting av utbyggingsområdet. Det må vera noko av den tettaste bustadbygginga som nokon gong er gjennomført i heile Stavanger, meinte Jostein Solvang frå Pensjonistpartiet.

• LES OGSÅ: No er Stavanger dyrast i landet
• LES OGSÅ: Stavanger har minst prisvekst av storbyene

Bebuarane reagerer

– Det verkar som både utbyggjar og administrasjonen i kommunen først og fremst tenkjer på bustadutbygginga. Medan skular, barnehagar og ikkje minst trafikksituasjonen, er noko dei skal koma tilbake til ein annan gong.

Denne meininga serverte Hilde Solsvik til bydelsutvalet. Ho bur i området og har engasjert seg i kampen mot planen om åtte etasjars bustadblokker og at det skal koma 500 nye leilegheiter inn i eit område som alt er svært tett bygd ut.

Ennå ein lang veg å gå

Nå blir det i første omgang Utval for byutvikling, som skal behandle den nye utbyggingsplanen i Lervig. Til sist er det Bystyret i Stavanger som skal ta den endelege avgjerda.