– Eg reagerer veldig sterkt på dette, og eg kan sjølvsagt ikkje akseptera det, seier styreleiar i Stavanger Konserthus, Tora Aasland.
Det er ikkje endeleg vedteke, men Skatt Vest har varsla at Stavanger Konserthus må betale tilbake over 256 millionar i moms på byggeprosjektet.
Har venta i sju år på svar
Enkelte offentlege utbyggingar kan få kompensert all moms når deira aktivitetar ikkje konkurrerer med andre.
Skattestyresmaktene meiner at all aktivitet i konserthuset er i konkurranse med andre, og at kravet om momsrefusjon difor går vekk.
– Då byggeprosjektet vart vedteke i Stavanger kommune, så eksisterte ikkje denne definisjonen. Men så kom det ein dom i EØS-systemet i 2008, og då spurte me om ei avklaring på korleis konserthuset kom til å bli råka, seier Aasland.
Etter sju år kjem no svaret, konserthuset har ikkje rett på å få kompensert momsen.
– Eit angrep mot kulturlivet
– Dette strir mot dei signal me har fått tidlegare, og me kan ikkje godta kravet, seier Aasland.
I går fekk kulturhuset Kilden i Kristiansand same beskjed, dei må betale tilbake nærmare 300 millionar i moms.
– Etter mi meining er dette eit ganske brutalt angrep mot kulturinstitusjonar og kulturlivet, seier Aasland.
– Blir ei nasjonal sak
– Dette kjem til å bli ei nasjonal sak, fordi det vil råke fleire konserthus i Norge, og få store konsekvensar for dei også, seier ordførar i Stavanger, Christine Sagen Helgø.
Kommunen står som største eigar, og kan difor få ein stor del av rekninga. Ho lovar mobilisering for å hindre at tilbakebetalinga blir ein realitet.
– Det er ikkje moms på kultur, difor skal ikkje Stavanger Konserthus betale moms for den delen av drifta som er kultur. Ja, noko i konserthuset er i konkurranse med annan verksemd, og der skal me betale moms, men ikkje for heile konserthuset, seier Sagen Helgø.