Haaland blir hylla for jærske gloser – «grævla bra»

Fotballspelaren frå Bryne i Rogaland imponerte stort på banen måndag kveld med daumetreff og to mål. Og etter kampen var det nærast jærsk språkshow føre mikrofonen.

– Dette er herleg. At han bruker det lokale, jærske ordforrådet på denne måten.

Språkdirektør Åse Wetås har fått med seg 20-åringen sin klokkeklare bruk av dialekt i intervjua etter kampar.

– Eg trur dei fleste forstår kva grævla betyr når Håland bruker det på denne måten. Det er ei form for nesten-banning.

– Nesten-banning?

– Det er på same måten som ord som helsikken, sallan og fasikken. Og andre meir eller mindre kreative omskrivingar av religiøse tabuord. Vi har slike ord på Sør-Vestlandet, men det er òg andre variantar for nesten-banning andre stader i landet.

Faren: – Naturleg å snakke jærsk

Erling sin far, Alfie Haaland, trur ikkje sonen tenkjer så mykje over bruken av den jærske dialekta.

– Han er frå Jæren, så det er vel ikkje så «løye» at han snakkar sånn som dei gjer der, seier den tidlegare Bryne-, Nottingham Forest-, Leeds-, Manchester City- og Rosseland-spelaren.

Og på Jæren er det òg hyllest å få for 20-åringen. Her er grævla eit godt innarbeidd ord. Eit ord som mange set pris på.

– Det er eit godt jærsk uttrykk. Folk frå andre delar av landet må berre tole det. På same måte som vi må tole bergensarar og nordlendingar sine uttrykk, seier Trygve Stueland Wist.

Dryla og hydna

Grævla er ein gjengangar når Håland opnar munnen føre journalistar etter kampar. Men kva betyr eigentleg dette ordet?

Opphavleg har ordet samanheng med greveligt som vi kjenner frå grevligur frå færøysk. Dette ordet blir brukt om ting som er grove å høyre på eller sjå på.

Ifølgje språkdirektøren er grævligt og grævla nesten-banning. For mange på Sør-Vestlandet blir orda sett på som eit erstatningsord for jævlig.

Men det snik seg òg inn andre dialektord når Braut Haaland blir intervjua. Som dryla og hydna.

Å dryla betyr å skyte veldig hardt. Men kva med hydna, språkdirektør?

– Hydna er den jærske versjonen av hjørnet. Her viser han fram den jærske dialekta i all si prakt, seier Wetås.

Fekk du litt ekstra lyst til å dra fram eigne dialektgloser no? Språkdirektøren meiner god dialektbruk kan påverke oss.

– Når vi høyrer denne tradisjonelle dialektbruken rundt oss, kan det hende det er delar av eigen dialekt vi har lyst å løfte fram igjen.

Vi har tidlegare kåra Rogalands beste dialektord. Sjå topp10-lista her: