Etterlyser tiltak etter helikopterstyrten

Helikopteret tek av frå Bergen lufthamn, Flesland.

Helikopteret mistar truleg radarkontat, ifølgje Aircraftregister.net.

Helikopteret treffer vatnet og ein nødpeilesendar blir aktivert. HRS får inn ei melding om at ein nødpeilesendar er utløyst og redningsleiarane på vakt går i gang med å sjekka nærare kva for ei maskin det er som sender signalet og prøver å få kontakt. HRS får beskjed om at ein personleg nødpeilesendar, av typen helikoptermannskap i eit redningshelikopter har på seg, er utløyst. Posisjonen til denne er i same område som nødpeilesendaren til helikopteret.  Avinor, ACC og tårnet på Flesland blir kontakta.

HRS får stadefesta at det er eit av redningshelikoptera frå Bristow, og at dei har vore ute på treningstur. HRS ber flygeleiar i Avinor sjekke om dei får kontakt med helikopteret. Tre minutt etter får dei tilbakemelding om at dei ikkje oppnår kontakt over radio. 

Redningshelikopteret Sola, som allereie er i lufta på trening, blir sendt i retninga nødsignalet indikerer. HRS alarmerer redningshelikopteret i Florø. Dei ber i tillegg Kystradio om å senda «mayday relay» til fartøy i området. KV Sortland stadfestar at dei set kurs mot området. Det blir avtalt at eit loshelikopter frå Flesland kan gå mot området. Også ambulansebåten Austevolljenta blir bedt om å gå mot området. Klokka 20.03 melder redningshelikopteret Sola at dei er omlag 15 minutt frå posisjonen. HRS ber Kystradio om å kalle ut redningsskøyter frå Redningsselskapet. Det er snakk om Bjarne Kyrkjebø og Kristian Gerhard Jensen II.

Hovudredningssentralen får opplyst at det er seks personar om bord.

Politiet får melding om helikopterstyrt vest for Sotra.

Redningshelikopteret Sola observerer folk i sjøen og startar prosessen med å heisa dei opp.

Øygarden kommune får melding om helikopterstyrten. Dei set krisestab. Personar blir observerte i sjøen og oppheising startar. Personane skal ha lege i sjøen i 45-50 minutt.

Redningshelikopteret Sola melder at dei ikkje ser sjølve helikopteret som har styrta.

Redningshelikopteret Sola melder at dei er på veg til Haukeland sjukehus med fem personar om bord. Grunnen til at dei må dra mot Haukeland er at dei ikkje har nok drivstoff til å vera i området. HRS veit at dei allereie har redningshelikopter Florø på veg mot søksområdet. Det er også ein luftambulanse i området som indikerer lokasjonen til den siste personen.

Politiet stadfestar at det har skjedd ei luftfartsulukke i sjøen vest for Sotra i Vestland.

Redningshelikopteret, med dei fem første personane som blei henta opp frå sjøen, landar på Haukeland universitetssjukehus i Bergen.

Redningshelikopteret Florø stadfestar funn av siste person. Fem minutt seinare stadfestar dei at dei har ein person om bord og reiser mot Haukeland. Det er rundt 25 minutt frå helikopteret Sola drog til siste person er om bord i redningshelikopteret Sola.

Havarikommisjonen er i gang med å bemanna opp.

Redningsaksjonen er avslutta.

Politiet opprettar mottak for pårørande. Redningsskøyta har begynt å finna vrakdelar. Dei søker etter fleire delar.

Politiet stadfestar at ein person er død. Ein annan er lettare skadd, medan dei fire andre har varierande skadegrad.

Haukeland universitetssjukehus opplyser at ein person er kritisk skadd, ein alvorleg skadd og tre lettare skadde.

Leiar for States havarikommisjon for luftfart seier at dei trur at vraket ligg på 300 meters djup.

Vest politidistrikt opplyser at det var ei kvinne i 60-åra, tilsett i Equinor, som omkom i ulykka. Dei andre fem i helikopteret var tilsette i Bristow.

Alle helikopterflygingar til og frå heliportar er innstilte fram til klokka 18. ConocoPhillips-flygingar er innstilte inntil vidare. Det er også flygingane for Aker BP.

Konsernsjefen i Equinor opplyser at den omkomne kvinna var sjukepleiar på jobb for å vareta andre.

Dei seks personane som var om bord på helikopteret hadde på seg overlevingsdrakt, seier politiet.

Politiet seier dei trur på at ferdsskrivaren, også kalla «den svarte boksen», på helikopteret vil bli funnen, men at jobben er utfordrande på grunn av høge bølger og sterk vind.

Energiminister Terje Aasland (Ap) sender sine tankar til dei ramma etter helikopterulykka. Samstundes ber han om ei grundig gransking av ulykka.

Equinor stansar alle helikopterflygingar til fredag klokka 10 etter ulukka utanfor Bergen. Det opplyser informasjonsdirektør Sissel Rinde til NTB.

Ifølgje VG har politiet avhøyrt to av dei som var om bord i helikopteret. – Vi har gjennomført to avhøyr og planlegg fleire i morgon, seier stabssjef Gustav Landro i Vest politidistrikt til VG.

Kystvaktskipet som bidrog i søket etter vrakdelar er på veg inn til Haakonsvern utanfor Bergen med delar dei har funne i sjøen. Det er stabssjef Gustav Landro i Vest politidistrikt som fortel dette til TV 2. Kystvakta skal på dette tidspunktet ikkje vera heilt sikre på kva slags delar dei har med seg, men dei tar det med inn til land. Her vil delane bli overleverte til politiet.

Haukeland universitetssjukehus sender ut ei oppdatering om korleis det går med dei skadde. Fredag morgon er to personar skrivne ut frå sjukehuset, to er lettare skadde, medan ein person er alvorleg skadd, men stabil.

Politiadvokat Trygve Ritland i Vest politidistrikt stadfestar til TV 2 at det er funne vrakrestar frå helikopteret, eit rotorblad og ei dør.

Det er eit opphald i flygingar fram mot klokka 12 fredag. Det framgår i meldingar frå Equinor og ConocoPhillips på nettstaden Heliport.

Equinor stadfestar at dei startar opp att helikopterflygingar på norsk sokkel fredag.

Havarikommisjonen har leigd inn eit offshoreskip for å halda fram med søk og deretter heving av vrakrestar. Det skrive Havarikommisjonen på deira nettsider.

Laurdag morgon får NRK stadfesta at ferdsskrivaren med lydopptak, også kjent som den «svarte boksen» er funnen. – Ferdsskrivaren vil vi omgåande ta med oss til eit laboratorium i England, saman med ein representant fra produsenten Sikorsky, seier Kåre Halvorsen i Havarikommisjonen.

Arne Lutro, kommunikasjonssjef i Vest politidistrikt, opplyser laurdag føremiddag at fire av dei fem overlevande er avhøyrde. – Ingen har status som mistenkt eller sikta, seier han, og opplyser at politiet også ønskjer å avhøyra den femte personen.

Laurdag kveld stadfestar Bristow, arbeidsgivaren til dei fem skadde mennene, at ein tredje person er skriven ut frå sjukehus.

Måndag har Havarikommisjonen ein pressekonferanse på Haakonsvern, der dei fortel om nokre av funna dei har gjort. Der kjem det fram at helikopteret sine flyteelement ikkje blei automatisk utløyste. – Vi veit ikkje kvifor flyteelementa ikkje har kome ut. Det er ein av tinga me skal sjå nærare på, seier Kåre Halvorsen i Havarikommisjonen. Han håpar ferdsskrivaren vil ha informasjon om flyteelementa. I tillegg peikar Havarikommisjonen på at helikopteret er nokså inntakt. – Det er openbart eit overlevbart samanstøyt, sjølv om ikkje alle gjorde det. Energien i seg sjølv under samanstøyten var ikkje problemet, seier Halvorsen.

Det blir kjent at den omkomne Reidun Hestetun var den siste personen som blei henta opp av vatnet. Medan dei fem overlevande vart henta av eit helikopter frå Sola, blei ho plukka opp av eit helikopter frå Florø. Dette kom til staden rundt 25 minutt seinare. Det var medisinske vurderingar og drivstoffmangel som bidrog til at det første helikopteret måtte returnera til fastlandet før den sjette personen var redda opp. Det er ikkje kjent korleis helsetilstanden til den sjette personen blei vurdert på det tidspunktet.

Havarikommisjonen skriv på sine nettsider at data er henta ut frå ferdsskrivaren, og at jobben med å analysera dataa er i gang. Det er venta at arbeidet vil ta lang tid, melder dei.

Ei veke etter helikopterhavariet er den femte og siste av dei overlevande framleis ikkje avhøyrt, seier politiet til NRK. Ingen er sikta eller mistenkte i saka.