Fryktar å måtte legge ned familiebedrifta: – Me må sjå om me overlev

– Me får sjå om me overlev. Me må snu alle steinar.

Det seier Lillian Holgersen. Saman med mannen Jan-Thor Holgersen driv dei Åmøy Fjordferie utanfor Stavanger.

Den vesle familiebedrifta har livnært seg på blant anna tyske turistar.

Det har vore god butikk. Til no.

For no er utfordringa å få nordmenn til å legge att feriepengane i eiget land.

Håpar nordmenn legg ferien utanom hytta

– Nordmenn er veldig glade i å feriere i eige land, men då som oftast på hytta. Så sparar me pengane til når me skal bu på hotell, ete på restaurant og gå på museum i utlandet, seier næringsminister Iselin Nybø.

Ho oppmodar nordmenn til å legge noregsferien utanom hytta denne sumaren.

– Det er mange fine stader å sjå her i Noreg. Eg trur dette kan bli ferien kor folk kan få ei ny oppleving i eiget land.

Ønsker å opne opp

Medan tiltaka lettar gradvis innanlands i Noreg og andre europeiske land, er ein framleis råda til å ikkje reise til utlandet.

– Me ønsker jo å kunne opne opp igjen. Me ser at fleire europeiske land opnar opp for nabolanda sine. Det er det me har lyst til å vurdere fram til 15. juni om me også kan opne opp for Norden og reise fritt mellom desse landa, seier næringsminister, Iselin Nybø.

Spørsmålet er om opninga av Noreg kjem for seint for fleire bedrifter i reiselivet.

• Europeiske land opnar grenser og strender.

Framleis mykje usikkert

Regjeringa vil innan 20. juli vurdere om det skal vere lov å reise til og frå Noreg til nære land i Europa utanom Norden.

Det gjer at mange utanlandske turistar som allereie har bestilt ferie i Noreg, ventar med å avbestille ferien.

– Me kan ikkje selje dei vekene som allereie er booka. Me har ikkje fått avbestillingar endå, seier Jan-Thor.

Dei trur det kjem nokre avbestillingar til veka, men fryktar at dei som har bestilt ferie etter 20. juli framleis blir sittande på vent.

– Det er veldig mykje usikkert. Både for oss og for gjestane.

Må legge om drifta

Restriksjonar frå myndigheiter og omsyn til smittevern har gjort til at familiebedrifta på Åmøy har måtte legge om drifta.

Frå å hovudsakeleg leige ut rom, må dei no leige ut heile hus.

Det går utover inntekta.

– Ein familie på 2 til 3 personar, som berre hadde trengt eit familierom, må no ha eit heilt hus, seier Jan-Thor.

Dei er innforstått med at dei kjem til å tape pengar på dette, men prøvar framleis å halde både drifta og motet oppe.

– Det er det valet me har.