– Det kjem flest kvinner inn, men eg legg også merke til menn, seier Marthe Vatne.
Ho er butikkleiar ved Fretex Arkivet i Stavanger og har jobba over 20 år i bruktbutikken.
På vegner av Sparebank 1 SR-Bank har Sentio Research gjort ei berekraftsundersøking. I ho kjem det mellom anna fram at berre 40 prosent av mennene er villige til å kjøpe noko brukt.
52 prosent av kvinnene svarte det same.
Kjøpar alltid bøker brukt
Brukthandel kan vere så mangt. Vatne har mange klesplagg i butikken, medan Finn.no byr på det meste.
For studentane Erlend Domino Sæbø og Daniel Alexander Miles kjem ikkje brukthandel inn i livet så ofte.
– Eg har aldri handla brukt, fortel Sæbø.
Jusstudenten trur grunnen er at han ikkje handlar så ofte. Når han først skal ha noko, er det lettare å berre kjøpe nytt.
– Eg tar gjerne ein storhandel ein gong i halvåret og handlar ein del jakker og sko, men elles er det lite, legg han til.
For kameraten handlar det meir om utvalet bruktbutikkane har.
– Eg handla litt bruk før, men har ikkje gjort det så mykje no. Eg finn ikkje så mykje som passar meg eller som eg synest er fint, og då kjøper eg det ikkje, seier Miles.
Han er likevel innom Finn.no for å kjøpe møblar eller skulebøker.
– Bøkene kjøper eg alltid brukt, for dei er så dyre, ler han.
Trur færre menn donerer klede
Det kjem ikkje like mykje brukte klede til menn som til kvinner, seier Vatne på Fretex. Ho trur dette bidreg til at færre menn kjøper brukte klede.
– Eg ser jo på min eigen mann. Han eig mykje mindre klede enn meg, så eg trur menn slit ut kleda meir enn kvinner. I tillegg kjøper dei mindre, og det er jo berekraftig, seier ho.
– Vi må få dei kjøpeglade mennene til å donere, for dei har jo klede, legg ho til.
Ein må fange mennene på ein annan måte, meiner butikkleiaren. Viss det var meir gjenbruk av verktøy eller materiale trur ho fleire menn vil valt brukte.
– Eg har høyrt om ein pop-up gjenbruksbutikk i Oslo der dei berre baserte seg på menn. Dei hadde samla mange fine dressar og andre bruktvarer. Eg høyrde det var ein stor suksess, seier ho.
Har handla brukt i snart 40 år
Janne Øgæland frå Sandnes har sett brukthandel sidan 80-talet. Ho seier ho nærast går automatisk frå togstasjonen rett inn i bruktbutikken.
– Vi byrja på 80-talet og lette etter nokre svarte jakker. Så er det nokre av oss som berre heldt fram, fortel ho.
Ho synest det er meir spennande å handle i ein bruktbutikk enn i ein vanleg butikk. I tillegg donerer ho ein del klede.
– Det er ein evig sirkel, men vi gjer noko godt av det, seier ho.
– Kva tenkjer du at menn ikkje handlar så mykje brukt?
– Nei, det har kanskje noko med imaget deira, svarer ho.
Kjem til å kjøpe brukt bil
Sæbø ser ikkje bort frå å kjøpe brukt i framtida.
– Eg kjem nok til å kjøpe min første bil brukt, ja. Bilar er så dyre og mistar verdi så fort ein vrir om nøkkelen, seier han.
Han kjenner til fleire kanalar der ein kan kjøpe brukt, men har ikkje hatt bruk for dei enno.
– Eg var innom Fretex for å finne noko til ein temafest. Eg fann ingenting, så då kjøpte eg heller ikkje noko, legg han til.