Cruise-reiarlag flaggar tilbake til Norge

Viktig for Norge at flest mogleg skip er registeret her i landet, ifølge sjøfartsdirektøren.

Olav Akselsen

Sjøfartsdirektør Olav Akselsen håpar det gir ei sterk signaleffekt til andre reiarlag at cruiseskipet «Viking Star» flaggar tilbake til Noreg.

Foto: Arne Gunnar Olsen

For første gong på ti år blir eit cruiseskip registrert i Norsk internasjonalt skipsregister (NIS).

Det skjer når cruiseskipet «Viking Star», med plass til 930 gjester, blir flagga direkte inn i NIS. Skipet er under bygging i Italia og er planlagt levert i slutten av mars.

Håpar på signaleffekt

Innflagginga er eit resultat av eit tett samarbeid mellom sjøfartsdirektør Olav Akselsen styreformann Torstein Hagen i bergensreiarlaget Viking Cruises.

– Dette er ei veldig god nyheit for heile den norske skipsnæringa, og eg håpar dette gir ei sterk signaleffekt til andre reiarlag om å følga etter, seier Akselsen.

Sjøfarsdirektøren seier det er ein fordel for Norge å ha flest mogleg skip registrert under norsk flag.

– Det betyr at me har større sjansar for å få gjennomslag i internasjonale forhandlingar om skipsfart. Det er viktig for norsk reiarnæring at me er sterke og har store musklar når me skal ut i den internasjonale kampen om gode og fornuftige reguleringar, seier Akselsen.

Tre søsterskip

Ytterlegare tre søsterskip skal bli bygde for Viking Cruises. Planen er at også desse skal registrerast i det norske skipsregisteret ved levering frå verftet.

Cruiseskipet «Viking Star» skal ha Bergen som heimstad og utgangspunkt for cruiset som har fått namnet «Viking Homelands»

Dåpen av skipet skjer i Bergen, på sjølvaste 17. mai.