Ikkje alle har hund og katt som kjæledyr. Nokon har rett og slett ein gris i hus.
For Inger Horve på Tjensvoll i Stavanger handlar det i stor grad om allergi mot meir tradisjonelle kjæledyr med pels. Då er ein skikkeleg stovegris eit godt alternativ.
– Eg kan ikkje ha hund og katt på grunn av allergi. Men eg er veldig glad i dyr, så derfor fekk eg meg ein liten gris. Det har eg ikkje angra på for «Trulte» er fantastisk fin å ha, seier ho.
Minigrisen på barne-tv
Treåringen «Trulte» er ein oppvakt gris som har lært seg mange triks. Ho hentar gjenstandar med munnen, gir labb og forstår ordrane til matmor. I tillegg går ho tur kvar dag.
NRK Rogaland har vore med på ein av turane og laga innslag til tv-programmet Dyrevenn på NRK Super (sjå innslaget i videoen i ingressen).
Turen gjekk til Stavanger sentrum. Og ut frå merksemda frå folk skulle ein nesten tru det var ei popstjerne ein filma i sentrumsgatene.
For eigarane, Inger Horve og Svein Hauge, er all merksemda noko dei er blitt vane med.
– Og folk har ingen hemningar mot å seia kva dei meiner om grisen. Anten dei meiner den er veldig fin, eller berre stygg og ekkel. Me meiner uansett grisen vår er det finaste dyret på planeten, seier Svein.
Mykje arbeid
«Trulte» er blitt ein viktig del av livet til Inger og Svein. Inne i huset har ho si eiga seng og matskål og ute i hagen er utedoen.
Ein gong i veka får ho seg ein dusj, sjølv om det ikkje er det kjekkaste for ein gris.
Men trass den tilsynelatande idyllen, Inger rår ikkje alle barn å få seg minigris som kjæledyr.
– Folk skal vera klar over at det er mykje arbeid. Men for meg er minigris eit undervurdert dyr.
Sjå heile programmet minigrisen var ein del av her.