Åtvarar folk mot å gå til Preikestolen

– Det er stor risiko ved å gå turen i morgon, i tillegg vil det heller ikkje vera noko stor oppleving, seier dagleg leiar i Stiftelsen Preikestolen, Audun Rake.

Torsdag er det meldt kraftig vind og regn i Rogaland, og det kan difor bli svært dårlege turforhold opp til Preikestolen.

Dårleg kledde turgåarar

I sommar trossa turistar dårlege vêrforhold, og det resulterte i fleire redningsaksjonar. Difor går Stiftelsen Preikestolen no ut og åtvarer i forkant.

– Me fryktar at folk blir kalde og fryser, og at dei dermed får alvorlege problem på grunn av det.

Mange av dei som kjem til Preikestolen er utanlandske turistar, og dei er ikkje alltid førebudde på det som ventar, fortel Rake.

– Me ser er at dei som kjem no er jamt over dårleg kledde, dei skjøner ikkje kva slags tur dette er. Dei er kledde som om dei skulle gå ein tur i parken. Det er ikkje forhold for det nå.

• LES OGSÅ: Turistnæringen vil stenge turistmål på uværsdager

Vil ta den strenge tonen

Dei kan ikkje nekta nokon å gå opp til Preikestolen, men Rake lovar at dei vil stå ved starten på stien og gi klar beskjed til dei som prøvar.

– Me kan be folk om å bruka hovudet. Og det nyttar, viss me berre er strenge nok.

– Og i morgon blir de strenge?

– I morgon blir me veldig strenge.

Men dei har også teke sine forholdsreglar. Folkehjelpa vil til dømes vera i beredskap, i tilfelle dei må rykka ut på kort varsel.

– Me held så høg beredskap som me overhovudet kan for å hindra at folk skal koma til skade, avsluttar Rake.