Alle vil vera sjørøvarar

– Eg skal høyra på ei kanon, fordi eg likar så godt at det seier "pang".

Johannes Tendenes er heilt i hundre. Han og faren, Anders Tendenes, har kledd seg ut som sjørøvarar og er om bord på museumsskuta Anna af Sand i Vågen i Stavanger.

• Les også: Slik overlever du Kaptein Sabeltann i sommer

Den store museumssjørøvardagen

– I fjor hadde me 700 personar innanfor dørene, I år trur eg det blir endå fleire, seier museumspedagog Kristin Vestrheim Cranner ved Stavanger maritime museum.

Dette året er det femte gongen dei innbyr til sjørøvardag på museet. Utstillingar inne i bygget, og nede ved kaien ligg skuta Anna af Sand. Ei seglskute som gjekk i fraktefart i Hardanger og Ryfylkefjordane frå 1848, og som nå er omgjort til sjørøvarskute med kanon.

– Det ligg jo der hos mange, den fascinasjonen for røveri og piratar og slikt. Så det er berre å plukke den opp. Det me gjer er å hekta på kulturarvbiten, og det likar folk, seier Vestrheim Cranner.

• Les også: Bloom blir sjørøver igjen

Piratar er gode greier

Sjørøvardagen har utvikla seg til å bli det største publikumsarrangementet som Stavanger maritime museum har.

– Det er det store publikumsfrieriet me har kvart år, seier museumspedagog Vestrheim Cranner.

For museet er dette eit lågterskeltilbod som skal få nye folk innanfor dørene til museet, som slett ikkje alle i Stavanger veit eksisterer.

– Folk likar jo å kle seg ut, det gjeld både for gutar og jenter. Og så er det noko barnefamiliar er vant med, seier museumspedagogen.

• Les også: «Sabeltann»-Formoe har privat skattekiste på over 16 millioner

Noko som blir stadfesta av Anders Tendenes, som har med seg sonen Johannes på sjørøvardagen.

– Det er alltid gildt å vera sjørøvar. Får eg sjansen så treng ingen å be meg to gonger, seier Anders Tendenes.