Einsame studentar: Slik vil høgskulen snu trenden

– Det å vere student er ikkje berre å øve, det handlar om å møte nye menneske og å vere litt sosial, seier Szymon Tadeusz Rys.

20-åringen har nyleg byrja å studere ved Høgskolen i Østfold. No deltar han på eit nytt prøveprosjekt.

Eit mentorprogram som er leidd av erfarne studentar.

Dei skal gjennom heile studieåret rettleie og gje fagleg hjelp til nye studentar. Men dei skal også bidra til å gjere studentkvardagen meir sosial.

• For å betre studentars psykiske helse foreslår ein studentpsykolog å innføre mobilfrie soner på høgskular og universitet.

Livet som student kan fort bli einsamt, seier den ferske studenten.

– Mentorordninga hjelper til å hindre dette. Eg synest det er ein fin måte å sosialisere litt på, seier Rys.

Får rettleiing

Mange studentar kjenner på einsemd og har det vanskeleg, viser Shot-undersøkinga i fjor.

Heilt sidan 2010 har Studentanes helse- og trivselsundersøking (SHoT) vist ein trend med gradvis dårlegare psykisk helse blant studentar.

Det er bakgrunnen for at høgskulen har sett i gang prøveprosjektet. Det fortel avdelingsdirektør for utdanning Frid Sandmoe.

– Vi brukte nokre av resultata frå Shot-undersøkinga, der vi såg at det var eit stort sakn å ha nokon å vere saman med. Fleire kjente seg utanfor. Det gjekk igjen ut over resultat på eksamen, seier Sandmoe.

Ein sosial arena

Malin Måsøy er blant studentane som er tilsett som mentorar.

– Det er veldig spennande. Eg har fått utfordra meg sjølv til å stå framfor ein del menneske og prate, snakke om tema som eg sjølv syntest var vanskeleg, seier Måsøy.

Då 24-åringen byrja å studere ved skulen for to år sidan, sakna ho ein sosial arena, som den ho no er ein del av.

– Eg trur ikkje eg hadde gått på høgskulen i dag viss eg ikkje hadde hatt nokon å samarbeide med, for det er mange vanskelege tema som ein treng å diskutere med andre, seier ho.

Vil utvide tilbodet

Avdelingsdirektør Frid Sandmoe fortel at dei har fått mange gode tilbakemeldingar på ordninga. Både frå studentar som har fått ein mentor og frå dei som er mentorar.

Prøveprosjektet har tatt for seg to bachelor-linjer, men det blir no utvida til ei rekke fleire linjer.

Sandmoe håpar at mange søker på dei nye stillingane som mentorar.

– Vi håpar jo også at nokre av dei som er mentorar vil fortsette. Slik at vi får med oss nokon med gode erfaringar.

Mentor Malin Måsøy oppfordrar også medstudentar til å vurdere å søke.

– Eg synest dette har vore ei veldig fin løysing. Dette er ei løysing eg synest alle skular burde ha, seier ho.

Szymon Tadeusz Rys er glad for at det er laga ei ordning som gjer det enklare for han å bli kjent med andre studentar.

– Viss du møter nokon på skulen, så har du berre eit kvarter pause mellom timane. Så det er relativt lite.

• Ventelistene for psykologtimar for studentar er lange. Likevel vil regjeringa kutte i tilbodet.